Perruquería Marisa.png

ESPAZO DISPOÑIBLE PARA ANUNCIARSE

Pladur Touro.png

ESPAZO DISPOÑIBLE PARA ANUNCIARSE

Permitiranse en Galicia as reunións de 6 persoas non conviventes en interiores e de 10 en exteriores

Incrementarase o aforo nos locais comerciais, reunións profesionais, actividades culturais ou académicas pasando do 50 ao 75% nos niveis medio e medio baixo


Laura Moure/Xeral

Feijóo, hoxe na roda de prensa.

O titular do Goberno galego, Alberto Núñez Feijóo, anunciou hoxe na rolda de prensa do Consello as novas medidas que entrarán vigor o vindeiro sábado, tras a reunión onte do comité clínico, e que hoxe mesmo serán enviadas ao Tribunal Superior de Xustiza de Galicia para a súa validación. Así, nun primeiro termo destacou que os concellos de Mos, A Pobra do Caramiñal e Lobios quedarán en nivel máximo de restricións e, polo tanto, estarán pechados perimetralmente, a hostalería permanecerá pechada e non estarán permitidas as reunións de non conviventes.

En nivel alto estarán os concellos de Ordes, Ribeira, Moraña, Ponte Caldelas e Viveiro. E, en nivel medio situaranse os concellos de O Barco de Valdeorras, Boiro, Rianxo, Cervo, Xove, Vilalba, Monforte, Moaña, Ponteareas, Cambados e Bueu.

No tocante aos avances na apertura, o presidente da Xunta anunciou que se ampliarán os máximos permitidos para reunións de non conviventes: de catro a seis en interiores e de seis a dez para as reunións en exteriores. Se ben, manterase a imposibilidade de reunirse con non conviventes entre a 1:00 e as 6:00 horas da madrugada.

Así mesmo, precisou que se incrementará o aforo nos establecementos comerciais, reunións profesionais, actividades culturais ou académicas pasando do 50 ao 75% cando sexa compatible co mantemento dunha distancia de 1,5 metros nos niveis medio e medio baixo.

En relación ás residencias da terceira idade, subliñou que naqueles centros situados en concellos en nivel medio e medio-baixo, os residentes poderán saír do centro todos os días, manténdose a duración máxima de catro horas. E aqueles traballadores que completasen a segunda dose da vacina hai sete ou máis días non terán que encher a enquisa epidemiolóxica que tiñan que facer cada día antes de empezar a súa quenda.

En paralelo a este proceso de apertura, Feijóo aseverou que Galicia continúa tamén co proceso de vacinación. Así, máis de 1.153.000 galegos teñen unha dose e máis de 612.000 están xa inmunizados coa pauta completa, o que representa case o 26% do total da poboación diana (maiores de 16 anos). “Un de cada catro galegos xa está inmunizado na súa totalidade”, precisou.

56 vistas0 comentarios

Entradas Recientes

Ver todo
IRS.jpg

ESPAZO DISPOÑIBLE PARA ANUNCIARSE