Urxen "a desbloquear a Lei que liquidaría estas brechas de seguridade"
Ecos da Comarca/Xeral
Os bombeiros lamentan "a súa descoordinación nas intervencións tras a DANA" e urxen a "desbloquear a Lei que liquidaría estas brechas de seguridade". En opinión da Coordinadora Unitaria de Bombeiros Profesionais (CUBP), a asociación máis representativa do país, as neglixencias detectadas nos labores de rescate das zonas do Levante arrasadas polo temporal podían evitarse parcial ou totalmente se a Lei Marco de Coordinación estivese xa en vigor e non fose obxecto do abandono por parte dos diferentes grupos políticos.

Os bombeiros lembran que esta Lei rexistrouse por primeira vez en 2018 e que formaba parte do programa do actual Goberno. Así mesmo, alertan de que o seu bloqueo agrava os efectos ante catástrofes naturais ou outros sinistros que requiran unha resposta decidida e unánime dos equipos de emerxencia. Por iso, manifestaranse o próximo 30 de novembro en Madrid, tal e como informaron nunha carta remitida ao ministro do Interior, na que solicitan unha reunión para buscar solucións conxuntas que permitan mellorar a protección e seguridade de todos os cidadáns.
Neste contexto, a CUBP avisa de que, a pesar de que miles de bombeiros profesionais mostraron a súa vontade de desprazarse ás zonas máis afectadas polo temporal nada máis transcender a magnitude da traxedia, non puideron traballar adecuadamente debido á ausencia dunha lexislación pertinente que permita intervir de maneira rápida e eficaz.
Publicidade
Os bombeiros mostran as súas condolencias ás familias das máis de 220 vítimas e lamentan profundamente non poder prestar unha axuda máis inmediata e coordinada fronte ás miles de persoas que presentaron cadros de hipotermia, sufrido falta de auga e electricidade, ou estado incomunicadas ou atrapadas entre entullos ou no interior de vehículos.
Finalmente, advirten de que o bloqueo político desta Lei seguirá comprometendo a seguridade cidadá ante incendios ou outras emerxencias climáticas, e doutra índole, pois moitas veces non pode actuar o parque de bombeiros máis próximo, senón que debe acudir ao que lle corresponda a zona afectada; o que alonga os tempos de intervención e deteriora perigosamente os servizos de protección que prestan estes profesionais.
Comments