Os Bombeiros Forestais de Galicia denuncian "a chapuza da Xunta na organización das oposicións"

"Está a darse unha improvisación constante, un continuo cambio de criterios, unha aleatoriedade nas decisións, un incumprimento dos prazos e unha flagrante falta de aplicación dalgunhas normas", asegura Apropiga

Ecos da Comarca/Xeral

A Asociación Profesional de Bombeiros e Bombeiras Forestais de Galicia (APROPIGA) denuncia "a chapuza que está a darse nos actuais procesos selectivos derivados da Lei 20/2021, os cales comezaron a negociarse en marzo de 2022 e a día de hoxe, xa coas convocatorias publicadas e co período de inscrición a piques de rematar, seguen a sufrir cambios continuos nas propias convocatorias, baremos, número de prazas convocadas, nos prazos de inscrición ou nos corpos e escalas que son obxecto do propio proceso". Entre os afectados atópanse profesionais das comarcas que lamentan esta situación.

"O baile no número de prazas e procesos que se convocan, pese a ser estes supostamente oficiais e atoparse xa en período de inscrición, está a obrigar unha e outra vez a unha corrección constante daquilo que xa foi publicado no Diario Oficial de Galicia, dándose incluso o caso da eliminación a última hora dalgúns procesos nos que xa había milleiros de persoas inscritas e coas taxas aboadas, como é o caso dos de emisorista-vixiante ou condutor de autobomba", sinala a asociación. Estes cambios obrigan, segundo explica, asemade á modificación dos prazos de inscrición, os cales xa foron ampliados en dúas ocasións pola presenza e rectificación de erros.

"Requisitos que non reúnen"

"Outro exemplo da improvisación que se está a dar é a clara invención de determinadas razóns para motivar a convocatoria de certas prazas que non reúnen os requisitos que recolle e motiva a Lei que rexe estes procesos, mentres que outras prazas que si os cumpren e deben ser convocadas quedan fóra. Claro exemplo disto é o que ocorre coas prazas descontinuas do Servizo de Extinción de Incendios Forestais que foron creadas no 2019, as cales sen cumprir os requisitos que a lei marca para a súa convocatoria, parte delas foron incluídas por Función Pública neste procesos".

Deste xeito, sinala, que o que "poderíamos definir como unha excelente oportunidade para a mellora do emprego público e a Administración pública galega, está a converterse nun cúmulo de decisións arbitrarias que prevén unha xudicialización eterna dos procesos. Un exemplo dos atropelos xurídicos que están a darse, é o relativo ó computo da experiencia, a cal por exemplo nalgunhas oposicións só se computa para algunhas prazas de carácter descontinuo, non sendo esta tida en conta para as prazas das mesmas categorías que traballan durante todo o ano. Isto é claramente contrario á mesma Constitución e os seus Artigos 14 e 23, razóns polas cales xa existen oposicións de estabilización anuladas, como é o caso das do Concello de Elche", recalca o colectivo.

Ó interminable número de erros na organización dos procesos e nas súas bases, "podemos sumar tamén outros tantos á hora de inscribirse nestes a través da aplicación que a Xunta dispón para ese fin (sistema FIDES). Así danse numerosos erros para completar as solicitudes, para axuntar o requisito de coñecemento da lingua galega (CELGA) ou para o cómputo e recoñecemento dalgunhas probas superadas que puntúan nos procesos".

Preme na imaxe se queres contactar connosco!

Procesos selectivos interminables

Os afectados lamentan que sexan uns procesos interminables. "A dilatación dos procesos selectivos xa realizados é outra das cuestións que ten ós opositores e traballadores públicos cansos da actitude e deixadez da Dirección Xeral da Función Pública, existindo unha gran cantidade deles que comezaron no ano 2018 e 2019 e aínda hoxe en día están sen rematar".

Por todo isto, dende APROPIGA consideran "inaceptable este alongamento e vulneración dos prazos establecidos nas propias leis para a conclusión dos procesos xa iniciados hai varios anos atrás. E mentres tanto, con procesos aínda sen concluír, están a abrirse outros novos exactamente iguais, algo que obriga a quen é de facto funcionario porque quedou en boa posición nas probas anteriores, a apuntarse a novos procesos selectivos pagando as súas taxas, volver pagar academias e sobre todo a preparar un novo proceso idéntico ó anterior, o cal está sen resolver por unhas razóns que non se coñecen e son totalmente inxustificables".