O Viveiro de Empresas de Silleda retoma o programa de dixitalización para pemes

Trátase dunha proposta pensada para achegar esta tecnoloxía de maneira clara, útil e accesible, afastada de tecnicismos e centrada en solucións reais para pequenos negocios

Laura Moure/Silleda

O Concello de Silleda retoma este mes o programa de dixitalización para pemes e negocios locais que se desenvolve no Viveiro de Empresas, unha iniciativa orientada a

acompañar ao tecido empresarial do municipio no seu proceso de modernización e adaptación aos novos retos tecnolóxicos.

Baixo o lema “Deixa que a IA traballe por ti e poida axudarche no teu emprendemento”, o programa continúa o seu itinerario formativo coa Sesión 4, dedicada á introdución á intelixencia artificial (IA) e ás súas aplicacións prácticas no día a día das empresas. Trátase dunha proposta pensada para achegar esta tecnoloxía de maneira clara, útil e accesible, afastada de tecnicismos e centrada en solucións reais para pequenos

negocios.

A sesión celebrarase hoxe, 4 de marzo, ás 19:30 horas, no Viveiro de Empresas da Área 33 de Silleda, en formato presencial e totalmente gratuíto. As persoas interesadas poden formalizar a súa inscrición a través do enlace na páxina web.

Unha ferramenta ao servizo do emprendemento local

A intelixencia artificial está a transformar a maneira de traballar, comunicarse e xestionar proxectos empresariais. Con todo, moitas pequenas empresas aínda perciben esta tecnoloxía como algo complexo ou afastado da súa realidade. Esta sesión nace precisamente co obxectivo de romper esa barreira e demostrar que a IA pode ser unha aliada práctica e alcanzable.

 Publicidade

Preme para obter máis información.

Durante a formación, abordarase como empregar ferramentas de intelixencia artificial para:

• Aforrar tempo en tarefas cotiás e repetitivas.

•  Crear contidos para redes sociais, páxinas web ou campañas promocionais.

•  Mellorar a comunicación cos clientes.

•  Organizar ideas, planificar accións e optimizar procesos internos.

A sesión combinará explicacións teóricas cun enfoque eminentemente práctico, ofrecendo exemplos concretos adaptados á realidade das pemes e dos negocios locais de Silleda.

 PUBLICIDADE

Preme na imaxe para contactar con nós!

Acompañamento paso a paso no proceso de dixitalización

Este programa de dixitalización enmárcase na aposta do Concello por reforzar a competitividade do tecido empresarial local, facilitando formación e recursos que permitan avanzar cara a unha maior profesionalización e presenza dixital. A iniciativa conta coa colaboración da Fundación Roberto Rivas e forma parte dunha estratexia máis ampla orientada a impulsar o emprendemento, fomentar a innovación e crear espazos de encontro e aprendizaxe para o empresariado do municipio.

Coa recuperación destas sesións formativas, o Concello de Silleda reafirma o seu compromiso de seguir acompañando aos negocios locais no seu proceso de transformación dixital, ofrecendo ferramentas prácticas e adaptadas á súa realidade, co obxectivo de que poidan medrar, innovar e afrontar con garantías os desafíos actuais.