O PSOE de Lalín solicitará máis ciclos formativos como unha FP de enerxías renovables

Alba Forno, candidata á Alcaldía, indica que tamén reclamarán á Xunta a posta en marcha de FP bilingües, “que nos demanda a mocidade e consideramos que son formacións que darán oportunidades ás futuras xeracións”

Ecos da Comarca/Lalín

"A mocidade é unha das grandes esquecidas deste Goberno" consideran os socialistas lalinenses e por iso, ao longo do seu programa, contemplan varias propostas para “ofrecerlle un futuro mellor e cheo de oportunidades”, indica a candidata á Alcaldía, Alba Forno. Para iso, nas medidas de Educación, recóllense varias iniciativas que permitirán aumentar a oferta educativa en Lalín e ofrecer máis instalacións para as reunións dos/as estudantes.

Establecer coas diferentes universidades e Centros de Formación unha feira, será unha

das medidas máis relevantes. “Nestes eventos, a mocidade pode coñecer de primeira

man toda a oferta educativa que teñen dispoñible, consultar as dúbidas e aclarar todas as

súas inquedanzas de cara ao seu futuro”, expón Forno. "Esta feira pode ser un atractivo

para toda a comarca e será un punto atractivo para Lalín.

“Solicitaremos máis ciclos de Formación Profesional, que actualmente están moi

demandados e ofrecen numerosas saídas profesionais á mocidade”, explica Forno. Entre

eles, está pedir unha FP de Enerxías Renovables e Instalacións Sostibles, que “será un

dos nichos de emprego nos vindeiros anos, pola situación na que se atopa a enerxía”. Así

mesmo, pediranlle á Xunta de Galicia a posta en marcha en Lalín de ciclos bilingües,

aproveitando os fondos que o Estado recentemente aprobou para as Comunidades

Autónomas. “Sabemos da importancia que teñen os idiomas para buscar emprego, por iso

é preciso mellorar o currículo da nosa mocidade neste eido. Notan a falta deste tipo de

formación e son viables para traelas a Lalín”, aclara a candidata.

Preme na imaxe se queres contactar connosco.

Forno indica que a demanda que máis escoita por parte da mocidade é contar cun horario

de biblioteca amplo, “medida que tamén afecta a todas as persoas que están opositando

ou facendo unha formación a distancia, que non teñen un horario amplo e, en moitas

ocasións, péchase sen previo aviso como vimos nestes catro anos”. Complementario a un

horario máis amplo da Biblioteca Municipal, habilitaranse espazos que se poñerán á

disposición da veciñanza para quedadas de traballos grupais ou reunións, sempre con

previa reserva. “A través dunha aplicación ou mesmo na biblioteca, poderán reservar

estes espazos que serven mesmo para reunións de colectivos que non teñen un recinto

físico para quedar. Cremos que é unha medida sinxela e que será de moita utilidade para

toda a veciñanza”.

A candidata á Alcaldía indica que hai moitas eivas na educación e “nestes catro anos non

se traballou para acadar melloras efectivas para as futuras xeracións, que moitas delas

son sinxelas e só cuestión de contar cunha boa organización, como pode ser o horario da

Biblioteca”.