O PSOE de Lalín solicita ao Concello a posta en marcha dos camiños escolares seguros

Ecos da Comarca/Lalín

O PSOE de Lalín pedirá, a través dunha moción que levará ao vindeiro pleno, ao Concello de Lalín que poña en marcha os camiños escolares seguros. "Ata hai pouco tempo en Lalín os cativos e cativas ocupaban as rúas para o xogo sen o acompañamento de persoas adultas e desprazarse a pé ao seu centro educativo era o máis habitual. Na actualidade, debido aos cambios experimentados como sociedade, esta autonomía limitouse de xeito drástico, entre outras cousas pola prioridade que teñen ós vehículos nas rúas", sinala o PSOE.

Este feito, engade, "provoca que cada día vexamos aglomeracións de vehículos ás portas dos colexios e institutos do casco urbano, coincidindo cos horarios de entrada e saída dos

nenos e nenas, onde tamén se dan situación perigosas para os propios estudantes e familiares provocadas por estas aglomeracións. Os camiños escolares seguros son unha medida que se está a implantar en numerosos concellos da nosa contorna, con moi boa aceptación por parte dos menores e das familias usuarias dos mesmos. Permiten reducir a circulación de vehículos nos horarios puntuais de entrada e saída dos centros e fan que sexa seguro e atractivo o camiño da casa ao centro escolar, ofrecendo unha maior autonomía aos cativos, que poden desprazarse sen a supervisión directa dun adulto, como se facía antes".

Publicidade

Preme na imaxe para obter máis información do evento.

En definitiva, recalcan os socialistas, "os camiños escolares fan que as nosas rúas sexan máis habitables. Trátase de promover e facilitar que os nenos e nenas camiñen ou se despracen de xeito autónomo, a través duns itinerarios indicados e acondicionados para que o desprazamento sexa unha actividade segura, sostible e agradable".

"A propia Dirección Xeral de Tráfico, fixou hai anos entre os seus obxectivos operativos a promoción de camiños escolares seguros, resaltando que para a súa posta en marcha é tamén precisa a implicación dos centros escolares e das familias. Estas iniciativas, teñen un impacto positivo na contaminación producida polos desprazamentos en vehículos, pero tamén contribúen a mellorar os malos datos de soidade e illamento que se reflexan entre a poboación máis nova, ou mesmo os datos de sedentarismo e obesidade que non paran de medrar nos últimos tempos. Supoñen polo dito melloras en canto á saúde, o medio ambiente e incluso un aforro económico ao non usarse os vehículos privados".

Publicidade

Preme na imaxe se queres contactar connosco.

O PSOE subliña que "coa posta en marcha dos camiños escolares seguros é posible crear un entorno seguro para a vida dos nosos nenos e nenas, cousa que é imprescindible para o desenvolvemento das súas capacidades físicas cognitivas e sociais".

Por todo o exposto, o Grupo Municipal Socialista do Concello de Lalín somete ao Pleno da Corporación a adopción do seguinte acordo:

1. Solicitarlle ao goberno local a que comece coa fase de estudo, diagnóstico e deseño dos camiños escolares seguros para os centros escolares da vila, contando coa participación de toda a comunidade educativa e demais asociacións que teñan a ben participar, co fin de poñer estas vías en funcionamento de cara o comezo do curso escolar 2024-2025.