Ecos da Comarca/Lalín
O PSOE de Lalín pide a comparecencia no vindeiro Pleno do alcalde do municipio, José Crespo, para que dea explicacións sobre a perda da axuda concedida polo Goberno de España a Lalín para acondicionar a planta baixa da praza de abastos e sobre as súas consecuencias para os intereses deste municipio.
Lembra que "en outubro de 2022 o Goberno central resolveu a convocatoria de axudas para rehabilitar edificios públicos a través do Plan para o Impulso da Rehabilitación de Edificios Públicos (PIREP) financiado con cargo aos fondos europeos do Plan de
Recuperación, Transformación e Resiliencia do Goberno de España. Un dos máis de 400 proxectos aprobados foi o presentado polo Concello de Lalín, dirixido a acondicionar a planta baixa da praza de abastos. En concreto aprobouse unha achega económica de 1,13 millóns de euros para esta actuación. O proxecto presentado polo Concello de Lalín prevía restaurar unha planta do mercado que na actualidade está case sen uso para abrir a praza cara ao campo da feira e instalar un espazo para negocios vinculados á hostalería. Tamén se prevía a mellora das fachadas".
Publicidade
Os meses foron pasando, indican os socialistas, "sen que trascendese publicamente ningún avance na execución deste proxecto, ata que en decembro de 2023 o alcalde anunciou que se valoraba renunciar á axuda pola suposta imposibilidade de executar e xustificar a obra no prazo máximo outorgado polo Goberno central (ata setembro de 2024, case dous anos despois da resolución favorable). O pasado mes de abril asinouse o decreto no que o Concello renunciaba de maneira definitiva á axuda de 1,13 millóns, polo que se obriga a devolver esta contía e, a maiores, a abonarlle ao Ministerio uns 55.000 euros en xuros".
Publicidade
En vista do anteriormente exposto, o PSOE somete á aprobación do Pleno a adopción
do seguinte acordo: Solicitar a comparecencia no vindeiro Pleno do alcalde para que dea
explicacións sobre a perda desta axuda e sobre as súas consecuencias para os intereses de Lalín.
Comentarios