O PSOE de Lalín lamenta que as festas das Dores non teñan ningún tipo de programación para os nenos

Saúda con satisfacción que finalmente vaia haber atraccións, mais lamenta as dúas semanas de incertidume e caos

Ecos da Comarca/Lalín

Os socialistas de Lalín saúdan con satisfacción que finalmente vaia haber atraccións nas festas das Dores, mais lamentan dúas semanas de incertidume e caos, froito dun goberno local que, como lle gusta dicir a destacados membros do PP, fixo “o canelo” neste tema. O PSdeG-PSOE sinala que “despois de querer pagar as festas a conta dos feirantes subíndolles os prezos un 300%, a Crespo non lle quedou máis remedio que recoller cable e apandar con todas as demandas do colectivo”.

Con todo, o PSOE lamenta que “as atraccións vaian ser o único entretemento que teñan os nenos e nenas nas festas cun cartel que non ten ningún tipo de programación para a infancia”. “Gastan 120.000 euros nunhas festas e non hai ningunha actividade para os máis pequenos, que terán que divertirse só se as familias poden afrontar o prezo das barracas”. Para o PSOE de Lalín “é unha cuestión inxustificable que demostra a nula sensibilidade cultural e cara os nenos e nenas do PP local, cun un cartel que semella un disparate e no que un ano máis o protagonismo absoluto é para as charangas e orquestras”.

Publicidade

Preme na imaxe para obter máis información!

Esta programación contrasta coas festas da época do goberno de coalición nas que se realizaban obradoiros, xogos gratuitos que enchían espazos como a praza de Loriga, funcións de monicreques, etc. “Por varrer co pasado ata eliminaron unha carreira solidaria que enchía de ambiente a rúa e que tiña como prioridade as carreiras infantís e para persoas con diversidade funcional”.

Publicidade

Preme na imaxe se queres contactar connosco.

Para os socialistas as políticas culturais e de lecer do PP son “chapuzas sen continuidade e sen sentido”. “Non sabían que facer co Orgullo e xa non ten a repercusion que tivo, só traen orquestas sen ningun sentido organizativo, pero a cultura e o ocio non pode programarse a golpe de invención diaria, como a proposta dun festival cando Crespo deixou morrer o máis diferenciado que había en Lalín que era a Foliada”.