Alba Forno explica que a situación se arrastra desde xullo e agosto e que na actualidade só está traballando a metade do plantel de facultativos
Ecos da Comarca/Lalín
O PSdeG-PSOE de Lalín denuncia que se están a producir listas de espera de máis dez días en atención primaria, tanto presenciais como telefónicas e que a sanidade lalinense está totalmente colapsada como consecuencia de anos de recortes da Xunta do Partido Popular. A secretaria xeral, Alba Forno, sinala que está situación se arrastra desde os meses de xullo e agosto “con saturacións e esperas inadmisibles para calquera veciño ou veciña cunha doenza”.
Alba Forno indica que actualmente só está a traballar no centro de saúde a metade do plantel de facultativos, o que provoca “unha falta de cobertura que é un grave problema, tanto para os usuarios como para os propios profesionais”. A socialista considera que esta situación é “límite” e que está obrigando a moitos veciños e veciñas a acudir a urxencias para recibir atención médica, cuestión que tamén provoca a saturación do PAC.
Publicidade
A concelleira explica que as agardas alcanzan nalgunhas ocasións os 15 días e que afectan en especial a persoas maiores que precisan receitas para medicamentos. “A falta de persoal sanitario na atención primaria lalinense é unha constante”, explica, “pero acrecéntase en verán por mor das vacacións, ante o inmobilismo do goberno galego e o silencio cómplice do alcalde Crespo”.
Publicidade
Alba Forno entende que “o goberno local semella dar por válida esta situación, pois igual que fai coa falta de ambulancias mantense impasible e calado para non danar os intereses da Xunta”. “A realidade é que as políticas sanitarias do PP con anos e anos de recortes que derivan nunha histórica falta de recursos, chegan a pór en risco a vida da veciñanza. Así mesmo, o ambulatorio segue caendo, mentres o único que sabemos do CIS é que segue acumulando atrasos e que non hai data para a súa posta en funcionamento”, conclúe.
Comentarios