O PSOE chama a respaldar o comercio e a revitalizar Lalín coa campaña 'Ven a Lalín no Nadal'

A proposta xira sobre catro eixos: o comercio, a hostalaría, a cultura e o lecer

Ecos da Comarca/Lalín

O PSdeG-PSOE de Lalín presentou este sábado a súa campaña de Nadal coa que pretende respaldar e fortalecer o tecido comercial local e revitalizar a vila nestas festas. Baixo o lema Ven a Lalín no Nadal a secretaria xeral, Alba Forno, explicou que a iniciativa busca mobilizar aos lalinenses, pero tamén á veciñanza de concellos próximos, “para que merquen nos establecementos da nosa localidade e a veñan desfrutar de todo o que Lalín pode ofrecer tamén en materia cultural e de lecer”. 

A campaña dos socialistas terá difusión en medios de comunicación e redes sociais e está aberta á que calquera cidadán poida sumarse. “Pretendemos, non só potenciar o crecemento económico do municipio, senón tamén concienciar sobre a relevancia de mercar no comercio local e sobre consumir produtos de proximidade, ao tempo que difundimos os atractivos e recursos do noso concello”, explica Alba Forno. Para iso, a campaña xira sobre catro eixos coas súas mensaxes e propostas concretas: O comercio, a hostalaría, a cultura e o lecer. 

“Son catro vertentes incomparables para atraer visitantes e activar Lalín nestas datas, pero a pasividade e a falta de traballo do goberno local do PP impide que a nosa vila exprima todo o seu potencial, de xeito que queremos darlle o apoio que non se ofrece desde o Concello”, explica.  

Publicidade

Preme na imaxe para obter máis información!

Deste xeito, a secretaria xeral indica que “o comercio de proximidade de Lalín ten sona pola súa calidade e bo trato”. “Temos máis de 200 comercios especializados con todo o que se precisa para triunfar este Nadal, pero desde o goberno local non se impulsou nin unha soa iniciativa a prol do tecido comercial nunhas datas tan importantes”. 

 Doutra banda, Forno sostén que “Lalín é terra de cultura e o 2023 está a ser gran ano para os nosos creadores e creadoras, pero o goberno abandonou completamente este eido e é incapaz de poñer en valor o potencial creativo de Lalín, ao tempo que invisibiliza a unha boa parte dos artistas. 

No referente á gastronomía explica que “temos os mellores produtos e a mellor gastronomía de inverno de toda Galicia, o cocido é un reclamo indiscutible que hai que seguir apoiando, pero Lalín é moito máis ca cocido e o PP está descoidando o sector”. 

Así, pon como exemplo que “nada se coñece xa da campaña “Lalín Sabe”, eliminaron por revanchismo o “Lalín con gusto”, xa non hai apoio para que os produtores leven o seu produto a eventos, marxinouse o mercado de proximidade dos sábados, eliminaron a feira da cervexa ou fixeron esmorecer o traballo feito coa marca “Pan de Lalín”. 

Publicidade

Preme na imaxe para obter máis información.

Por último en canto o lecer, Forno destaca as iniciativas de colectivos para dar a coñecer o noso patrimonio natural e cultural, a música en vivo, ou as Aldeas de Nadal, máis considera “un despropósito a falta de información que sofren os que nos visitan nestas datas”. “A 15 de decembro non está publicada a programación cultural, improvisan e non aproveitan os recursos dos que dispoñemos para promocionar Lalín axeitadamente”.

Publicidade

Preme na imaxe se quere contactar connosco.

Ademais, sinala que “cunha concelleira dedicada en exclusiva ás Aldeas de Nadal, é incomprensible que a iniciativa non se mellorase, que non haxa nada novo con respecto a anos anteriores e que se respire desorganización”. Así, lembra que “segundo o anunciado polo propio goberno local, este ano ía poñerse en marcha a “aldea dos doces” na Praza de Galicia, pero non se levou a cabo e isto merece unha explicación por parte de Káren Fernández, a que relegaron da concellería de Comercio pola súa nefasta xestión o pasado mandato”. 

No acto de presentación da campaña tamén estivo o secretario local de organización, Juan Justicia, o concelleiro, Anxo Álvarez, o membro da executiva, Nicolás González Casares e o membro da última candidatura ás municipai, Antón Branco.