O PSOE acusa á Xunta de "facer vista gorda coa contaminación provocada pola mina de Touro"

"Aplica a Lei do Far West coas explotacións mineiras", afirma

Ecos da Comarca/Touro

O portavoz de Medio Ambiente do Grupo Socialista, Pablo Arangüena, acusou este venres á Xunta de “facer a vista gorda coa empresa responsable dos vertidos da mina de Touro". Arangüena presentou unha pregunta na Comisión de Medio Ambiente do Parlamento pola “inacción e tolerancia do incumprimento da legalidade” por parte do goberno galego.

Censurou que a Xunta "tan só teña imposto 55.000 euros en tres sancións dende o ano 2009, logo de décadas de vertidos sobre afluentes do río Ulla, en zona de Rede Natura, e que desembocan na ría de Arousa, que está a rexistrar unha caída moi acusada da produción marisqueira". Criticou que o Executivo “non sanciona, non obriga a restaurar e temémonos o que pretendan autorizar no futuro”.

O parlamentario socialista lembrou que os efectos sobre o medio ambiente da extracción de cobre nesta mina nos anos 70 e 80 "continúan sendo palpables décadas despois do seu peche, nunha instalación que leva moitos anos realizando depósito de residuos nos terreos da mina. Ademais, logo de anos de vertidos, a dirección xeral de Minas realizou unha inspección que constatou a drenaxe áceda sobre as augas dos regatos Portapecho, Felisa e Angumil".

Alertou "de que a accionista maioritaria da empresa que controla a mina é hoxe a multinacional Trafigura, presuntamente vencellada co pago de subornos á petroleira Petrobras, segundo a Fiscalía de Brasil, e condenada polo desastre ambiental de Costa de Marfil de 2006". Lembrou que aqueles "vertidos tóxicos provocaran a morte de 16 persoas e o tratamento sanitario de en torno de outras 10.000".

Preme na imaxe para acceder á web desta empresa.

Esixe medidas

Arangüena criticou que este caso se suma "á recente autorización do vertido de 900.000 metros cúbicos de augas residuais da mina de San Finx sobre a ría de Muros e Noia, e centos de exemplos de empresas que se saltan a normativa coa conivencia da Xunta, que “permite ás empresas aplicar unha especie de Lei do far west”. Alertou "da combinación de empresas que non exercen a súa responsabilidade e dunha administración que non controla nin obriga”.

Así mesmo, esixiulle á Xunta que “adopte tódalas medidas necesarias para evitar a contaminación procedente da mina de Touro, incluíndo a inspección periódica e a execución das medidas preventivas habilitadas pola lexislación e as sancións necesarias". Ademais, reclamou que “garantan que calquera proxecto autorizado en relación coa mina non produza ningún tipo de dano ao medio e instalen sistemas de medición da contaminación nos afluentes que pasan pola instalación".

Preme na imaxe se queres contactar connosco!

Recalcou que “somos partidarios dunha mineiría responsable que minimice o seu impacto no entorno, pero para eso ten que haber control”.