O PSdeG-PSOE de Lalín acusa a Crespo "de crear ruído e bulos para tapar a súa nefasta xestión"

Alba Forno denuncia que "o alcalde recoñece irregularidades no padrón, bota balóns fóra e sementa sospeitas sobre a poboación inmigrante"

Ecos da Comarca/Lalín

A voceira municipal dos socialistas de Lalín, Alba Forno, acusa ao alcalde José Crespo "de instalarse nunha estratexia baseada na confrontación constante, o insulto e a propagación de bulos, coa única finalidade de ocultar a súa incapacidade para xestionar os problemas reais da veciñanza". “Primeiro insulta aos detractores de Altri e á xente das cidades e agora busca polémicas sobre os colectivos migrantes para que non se fale das múltiples carencias que ten a veciñanza de Lalín”, afirma.

Forno sinala que a rolda de prensa de Crespo sobre o padrón municipal "non foi máis que un novo intento de crear confusión e tensión social, ao tempo que recoñece irregularidades e tenta eludir a súa responsabilidade política culpando aos funcionarios e técnicas municipais do escándalo do Padrón, cando o máximo responsable do Padrón por Lei é o alcalde, como se comproba cando asina decretos con baixas de centos de persoas estranxeiras".

Publicidade

Preme na imaxe se queres contactar connosco.

“Crespo está máis preocupado por manterse no foco e manipular á opinión pública que por abordar a situación da vivenda, o abandono da sanidade pública, a falta de posibilidades de conciliación, o peche de comercios, a suba do paro, ou a inexistencia de alternativas culturais e de ocio na nosa vila”. “Ataca a quen discrepa, sementa divisións e tensiona o municipio, só para distraer da realidade”, insiste a portavoz socialista.

Desde o PSdeG-PSOE lamentan que o alcalde "se dedique a sementar bulos perigosos que estigmatizan á comunidade migrante, ao tempo que lamenta que Crespo xa non se corte á hora de asociar inmigración con delincuencia”.  “O que Crespo pretende con esta espiral é tapar a súa incompetencia recorrendo a estratexias vellas e perigosas: culpabilizar a quen vén de fóra e atacar a quen pensa distinto”, conclúe.