O PSdeG denuncia o malestar das persoas abonadas do Parking Europa tras unha reunión “impositiva”

Os socialistas critican que o goberno local obrigue ás persoas usuarias a cambiar de praza “sen diálogo” e esixen a devolución das cotas

Ecos da Comarca/Lalín

O PSdeG-PSOE de Lalín denuncia o malestar das persoas usuarias abonadas do Parking Europa tras a reunión celebrada o venres co goberno local, que cualifican de “impositiva e sen ningún tipo de diálogo”. A voceira socialista, Alba Forno, explicou que os/as abonados/as foron convocados para comunicarlles directamente un cambio no modelo de uso do parking, obrigándoos a trasladarse á segunda planta e a perder as súas prazas actuais, sen posibilidade de negociación. “Foi chegar, sortear as prazas e impoñer unha decisión que empeora claramente as condicións dos/as usuarios/as”, sinalou.

Neste sentido, Forno indicou que moitos/as abonados/as trasladaron o seu descontento pola perda de comodidade, polos accesos máis complicados e pola sensación de inseguridade nalgunhas zonas, especialmente en horario nocturno. “Estamos falando de persoas que levaban tempo utilizando o servizo e que agora ven como se lles cambia todo sen contar con elas”, apuntou.

"Un modelo inxusto que non resolve o problema"

O PSdeG considera que o novo sistema “non só é incómodo, senón tamén inxusto”, xa que os/as abonados/as seguen pagando mentres o estacionamento continúa sendo gratuíto e sen control para o resto de persoas usuarias. “O problema de fondo non se resolve: o parking segue sen rotación e pode converterse nun espazo onde os coches permanecen días sen moverse, mentres quen paga ten peores condicións”, explicou Forno.

 PUBLICIDADE

Se queres obter máis información do evento preme na imaxe.

Ante esta situación, os socialistas esixen ao Concello a devolución das cotas abonadas polos usuarios durante o último ano, ademais dunha revisión do modelo actual e a adopción dun sistema que garanta rotación, equidade e utilidade para o conxunto da cidadanía. “Non ten sentido que se obrigue a pagar por un servizo que agora é peor que antes”, subliñou a voceira socialista.

 PUBLICIDADE

Preme para obter máis información.

Desde o PSdeG lembran que o Parking Europa funcionaba cun sistema mixto que combinaba a gratuidade no horario comercial coa rotación e o uso ordenado do espazo. “O goberno de Crespo decidiu cambialo por completo por un modelo de gratuidade total que acabou xerando máis problemas que solucións”, concluíu Forno.