O prazo para participar na bolsa de emprego para auxiliares do SAF en Silleda será dende mañá ata o 7 de maio

As bases para participar no proceso xa se poden consultar na web municipal e no taboleiro de anuncios da Sede Electrónica

Laura Moure/Silleda

O Concello de Silleda constituirá novamente unha bolsa de traballo para auxiliares do Servizo de Axuda no Fogar (SAF), a fin de cubrir baixas, vacantes, o aumento de persoas usuarias ou calquera necesidade urxente que puidera xurdir para a prestación do servizo no municipio. As bases para dita constitución de dita bolsa foron aprobadas na última sesión da Xunta de Goberno Local, e xa se poden consultar dende hoxe.

Tal e como establecen, o prazo de presentación de solicitudes é de 5 días hábiles contados a partir de mañá, día 30, polo que o prazo rematará o vindeiro martes día 7 de maio. Para realizar a selección, unha vez aprobada a lista de persoas aspirantes admitidas haberá unha proba selectiva, mediante sistema de oposición, cunha fase teórica (cuestionario de 20 preguntas tipo test).

Poderán participar persoas ca titulación de técnico/a en coidados Auxiliares de Enfermería ou equivalente; técnico/a de atención sociosanitaria ou equivalente; que teñan o certificado de profesionalidade de atención sociosanitaria a persoas dependentes e institución sociais; certificado de profesionalidade de atención sociosanitaria a persoas no domicilio; ou certificado de habilitación excepcional ou provisional para o exercicio profesional na categoría de Auxiliar de Axuda no Fogar.

A constitución desta bolsa forma parte dunha serie de melloras que o Concello de Silleda está a implementar no Servizo de Axuda no Fogar (SAF) que xestiona a propia entidade local, dando así cumprimento aos compromisos acadados nas últimas reunións mantidas polo goberno municipal tanto cas auxiliares sociosanitarias como cas familias das persoas usuarias.

Publicidade

Preme na imaxe se queres contactar connosco.

A mellora da comunicación e coordinación entre as auxiliares e as traballadoras encargadas da coordinación do servizo vaise realizar a través da contratación da aplicación CIBERSAD Profesional, ampliando así as ferramentas do sistema de xestión do servizo e facilitando o traballo entre ambas partes.

A formación da plantilla é outra das melloras que se implementaron nas últimas semanas, ca realización de cursos sobre a mobilización de persoas dependentes e outra que se realizará proximamente sobre habilidades sociais.

Outra das iniciativas de mellora, é o servizo de atención psicolóxica para as auxiliares do servizo, que poden solicitar no propio departamento de Benestar.