O PP de Melide denuncia "53 reparos de intervención por facturas irregulares e contratos que non cumpren coa legalidade vixente"

Ecos da Comarca/Melide

O Grupo Municipal do Partido Popular de Melide denuncia publicamente "a existencia de 53 reparos formulados pola Intervención Municipal durante o exercicio 2024, derivados de facturas irregulares e contratos tramitados fóra do procedemento legalmente establecido, moitos deles sen a preceptiva fiscalización previa". Sinalan que através dun informe "elevado ao pleno pola propia interventora municipal, quedou constancia dunha situación que", segundo advirten dende o PP, “é cada vez máis preocupante e demostra unha clara deriva na xestión económica do goberno local”.

"Entre as anomalías detectadas figuran incidencias en materia de nóminas, facturación irregular, recoñecementos extraxudiciais de crédito correspondentes a exercicios anteriores, así como certificacións de obra emitidas sen cobertura legal suficiente. Estes feitos motivaron, segundo recolle o informe, a remisión de información ao Tribunal de Contas, co fin de avaliar posibles responsabilidades contables ou financeiras".

Publicidade

Preme na imaxe para obter máis información do evento.

“Está a xerar un desequilibrio financeiro evidente no Concello de Melide e unha vulneración reiterada dos principios de legalidade, control e transparencia na xestión dos recursos públicos”, aseguran os populares.

A situación, segundo manifestan dende o grupo popular “a pesar dos reiterados informes desfavorables que ano tras ano advirten destas irregularidades, o goberno municipal segue incumprindo de forma sistemática os principios básicos de legalidade, transparencia e control do gasto público”.

Publicidade

Preme na imaxe se queres contactar connosco.

O Partido Popular alerta, ademais, de que "esta situación reiterada de incumprimentos e mala xestión económica está a provocar que o Concello de Melide entre nun desequilibrio financeiro preocupante, que podería ter consecuencias negativas para a prestación de servizos públicos e o futuro económico da entidade local". O PP de Melide esixirá responsabilidades políticas ante un contexto que cualifican de “insostible”, e avanzan que levarán ao pleno as iniciativas necesarias para reclamar transparencia, depuración de responsabilidades e unha xestión rigorosa dos fondos públicos.