O PP de Melide acusa ao bipartito de condenar o Campo Grande a un “bloqueo" de acceso ás casas

Ecos da Comarca/Melide

O PP de Melide recibiu queixas, tal e como indica, dos veciños da rúa Camiño Real e do Campo Grande en xeral, dado que están empantanados nos accesos as súas vivendas. "Estes veciños, cansos de chamar ao Concello recorren á nosa formación para informarse xa que a resposta do bipartito AM- PSOE é o máis absoluto silencio. Un concello que continúa de vacacións e non escoita os melidenses”, recalca.

Apunta que a situación na rúa Camiño Real e arredores imposibilita o normal discorrer do tráfico rodado cara esa zona de Melide. "E os afectados non só son os veciños e veciñas que residen na mesma senón que imposibilita un tránsito normal cara servizos públicos como o CEIP Mestre Pastor Barral ou o propio centro de saúde".

Ademais, sinala que "hai semanas que se rematou a obra, unha obra que quedou

orzamentada e proxectada con todos os permisos pola anterior Corporación 2015/2019. O retraso na súa apertura e posta en funcionamento é unha mostra máis de que o bipartito paraliza a xestión pública da nosa vila". Así mesmo, recorda que esta situación xa se produciu coa rúa Mestre Segade Bugueiro. "Só se puxo en funcionamento unha vez que o PP denunciou a situación".

Tamén apunta que o trastorno aos accesos domiciliarios únese o da reorganización do

tráfico neste punto de Melide moi próximo a unha área comercial que implicou cambios de sentidos nas rúas onde unha vez máis, "o goberno bipartito AM-PSOE fixo “mutis polo foro” ás demandas veciñais", A portavoz melidense, Dalia García, subliña “nunca antes Melide sufrira un goberno como o actual. Esiximos que se conte coa veciñanza para cambios transcendentais nas rúas. É fundamental o consenso. A inactividade do bipartito melidense non ten fronteiras, rúas rematadas pechadas ao tráfico froito do traballo da anterior Corporación que, dous anos despois, nin son capaces de poñer andar”.