O BNG de Silleda propón crear un centro cultural da vila na antiga Casa Consistorial

Ecos da Comarca/Silleda

O BNG de Silleda, vén de presentar unha moción para debate no próximo pleno municipal ordinario, previsto a finais do mes de marzo, no que se insta ao goberno municipal a redactar un proxecto para rehabilitar o antigo edificio consistorial e convertelo nun centro cultural que sexa o centro da vida social e que actúe como revulsivo e motor da programación cultural e artística municipal.

Na moción, denúnciase a falta de espazos municipais na vila destinados a acoller exposicións ou outras expresións artísticas como teatro ou danza, situación que se viu

agravada logo das obras para converter a antiga casa da cultura na casa do concello. Así, o anterior edificio contaba con algunhas salas que podían usarse para exposicións e o antigo salón de actos tiña un aforo moito maior ao actual salón situado ao carón do

salón de plenos.

Publicidade

Preme na imaxe para obter máis información do evento.

Por todo iso, desde o BNG consideran imperativo que unha vila como Silleda conte cun

centro cultural de calidade, polo que propoñen destinar o primeiro andar da antiga sede municipal a salas de exposicións, mentres que o segundo andar podería destinarse a

acoller unha gran sala de usos múltiples, á que se podería incorporar unha grada retráctil

ou desmontable que permitise acoller actuacións e eventos de diversa clase, como

concertos ou teatro.

Para a redacción do proxecto, o BNG insta ao goberno a consultar as necesidades que poidan trasladar os distintos colectivos adicados a produción cultural, así como a contar

co asesoramento de profesionais das artes escénicas, co fin de que o deseño do espazo

sexa realmente útil e cumpra cos estándares técnicos precisos para acoller unha sala

de actuacións polivalente.

Publicidade    

Preme na imaxe se queres contactar connosco.

“O concello é un referente a nivel cultural grazas principalmente ao traballo de todos os colectivos, por iso a vila debe recuperar canto antes un centro cultural que sirva para

amosar toda esa actividade e que actúe como motor para novas iniciativas que de

seguro han xurdir nos próximos anos”, recalca a voceira local, Erea Rey, ao tempo que

reclama que o goberno municipal carece de iniciativa propia en materia de xestión

cultural, máis alá de ser “un mero colocador de carpas”.