O Pino comeza a repartir o contedor para materia orgánica no núcleo Pedrouzo e á hostalaría

Unha técnico de Sogama estivo explicando como fomentar a recollida selectiva e que tirar en cada contedor

Laura Moure/O Pino

O Concello do Pino comezará esta semana a distribuir o contedor marrón no núcleo de Pedrouzo e entre aqueles locais de hostalaría ou grandes xeradores de materia orgánica que o soliciten. Para facilitar o bo uso e contribuír á reciclaxe en orixe, unha técnica de Sogama impartiu unha charla informativa para explicarlle á veciñanza como mellorar a separación de residuos na casa e que se pode tirar en cada contedor.

Aproximadamente o 40% da composición media dunha bolsa de lixo tipo corresponde a materia orgánica, polo que incorporar o contedor marrón para a recollida específica desta fracción posibilita a súa recuperación en forma de abono na correspondente planta de compostaxe de Cerceda.

Ademais de concretar os materiais a depositar no contedor marrón, a técnica explicou a infraestrutura industrial deseñada pola Xunta e executada por Sogama. A materia orgánica deste contedor trátase nunha planta de biorresiduos en Cerceda, na que se produce compost de boa calidade que se utiliza como fertilizante natural na agricultura e na xardinaría.

Publicidade

Preme na imaxe para obter máis información!

A partir da vindeira semana, o Concello do Pino instalará o contedor marrón no núcleo urbano de Pedrouzo e tamén llelo facilitará a aqueles establecementos (restaurantes ou grandes xeradores de materia orgánica) que o soliciten. Deste xeito darase cumprimento a lexislación europea para facilitar a recollida selectiva de materia orgánica e que obriga a ter implantado o contedor marrón antes de que remate o ano.

Ademais do colector para materia orgánica, o Concello do Pino vai repartir composteiros domésticos nas vivendas unifamiliares, para facilitar a reciclaxe da materia orgánica e facer compost.

Para facilitar a reciclaxe de forma exitosa, é imprescindible facer unha boa separación na casa, para que o 95% dos materiais que se depositen no contedor marrón sexan compostables.

Publicidade

Preme na imaxe para obter máis información.

Que se pode botar no contedor marrón

Na charla de onte, a técnica explicoulle ás persoas asistentes que se pode botar no contedor marrón y que non debemos depositar nel. Aclarou que, se utilizamos bolsas para tirar a materia orgánica, estas bolsas deben ser biodegradables ou compostables.

No contedor marrón pódese depositar:

• Restos de alimentos:

• Crus ou cociñados de froitas, verduras, legumes e hortalizas.

• Restos de orixe animal: carne ou peixe (ósos, carne cocida, restos de peixe e marisco, espiñas, cunchas de mexillón, ameixas, …).

• Peladuras de patacas.

• Restos de pasta e arroces.

• Restos de froitos secos.

• Sementes e cereais.

• Ósos de froita.

• Restos de pan, bolería e galletas.

• Cortizas de queixo.

• Papel de cociña usado e panos de mesa de papel (sen restos de aceite).

• Pousos de café e bolsiñas de infusións.

• Restos de plantas, flores, follas secas, herba e pequenos restos de poda e hortas.

• Alpiste

• Cascas de ovo.

• Tapóns de cortiza natural.

• Bolsas compostables.

Publicidade

Preme na imaxe se quere contactar connosco.

Non debemos depositar:

• Aceite de cociña ou calquera outro líquido.

• Cueiros, compresas e tampóns.

• Papel hixiénico.

• Ramas de podas.

• Restos aspirados ou varridos.

• Cabichas de tabaco.

• Calquera outro material de plástico, vidro, pilas, etc.