A delegada da Xunta na provincia da Coruña, Belén do Campo Piñeiro, será a pregoeira desta edición
Laura Moure/O Pino
O Concello de O Pino prepárase para celebrar un ano máis a Festa do Galo Piñeiro e Mostra Cabalar, unha cita que congregará a milleiros de persoas en Arca durante o 3 e o 4 de agosto. Declarada Festa de Interese Turístico de Galicia, esta celebración ofrece unha ampla variedade de actividades para todas as idades, destacando as exhibicións de galiñas e galos piñeiros, a feira de ‘Artesanía no Camiño’, os espectáculos de freestyle motocross e ecuestre, concertos e moito máis.

A festa comeza o sábado cun impresionante espectáculo de motocross na rúa Mollaos. A partir das 19:00 horas, os asistentes poderán desfrutar das acrobacias de Pedro Moreno, catro veces campión de España de Freestyle, e do británico Greg Rowbottom, nunha
exhibición que promete sorprender a todos os presentes.
O día concluirá cun concerto na praza de Forcarei ás 20:30 horas, onde a Banda de Música de Arca e o grupo Ailá unirán as súas forzas para ofrecer unha actuación única. O grupo Ailá levará ao público a unha viaxe polo universo folk, inspirado na música tradicional de transmisión oral.
Actividade dende primeira hora o domingo
O domingo, tras o estoupido das bombas de palenque que anuncian o inicio das festas,
abrirase a Mostra Cabalar ás 09:00 horas e a XXIII Feira de Galos e Galiñas de Raza Piñeira ás 10:00 horas.
Publicidade
Desde as 11:00 horas, a xornada estará chea de actividades para todos. A charanga NBA animará as rúas, mentres que a feira Artesanía no Camiño ofrecerá talleres demostrativos
de bolillos, bordado ao aire, coiro e xoguetes de madeira. Ás 13:00 horas, celebrarase o
‘Mini festival circense’ e ás 18:00 horas o espectáculo de rúa ‘Hoxe si!’. Ás 13:00 horas, a sesión vermú con EME Music dará paso á degustación gratuíta de galo piñeiro, seguida do pregón a cargo da delegada da Xunta da provincia da Coruña, Belén do Campo Piñeiro.
A Feira de Galos e Galiñas vivas de Raza Piñeira entregará premios aos mellores exemplares ás 14:30 horas, seguida do tradicional xantar popular ás 15:00 horas na carpa
situada preto da praza de Forcarei. As inscricións para participar realizaranse a partir das
9:30 horas na propia feira.
Publicidade
Na Mostra Cabalar, os concursos comezarán ás 10:00 horas e continuarán pola tarde ás 17:30 horas, coa entrega do premio especial Faísca. En total repartiranse máis de 3.400 euros en premios. Dende as 19:00 horas realizaranse as probas de trotóns e de arrastre,
xunto á concesión de galardóns aos gañadores da Mostras Cabalar deste ano 2024,
pechando co espectáculo ecuestre de Paco Martos ás 20:30 horas, un evento que o ano pasado encantou a máis de dúas mil persoas.
Entradas para o Xantar Popular
As entradas para o xantar popular do domingo 4 de agosto xa están á venda nos locais de
restauración do municipio a un prezo de 25 euros, dispoñibles ata hoxe, venres 2 de
agosto. No caso de quedar entradas sen vender, poderán adquirirse o mesmo domingo no
stand do Concello de O Pino na praza de Forcarei.
Comments