O mosteiro de Carboeiro contará con entrada libre este domingo polo día dos Museos

O horario de apertura é de 11:00 a 14:30 e de 16:30 a 19:00 horas

Laura Moure/Silleda

O mosteiro de Carboeiro contará con xornada de portas abertas este domingo día 17, coincidindo co Día Internacional dos Museos, que se ben se conmemora o luns 18, se adianta á xornada dominical ao estar pechado o centro o luns. A ordenanza que regula as taxas de acceso ao edificio patrimonial recolle que non se cobrará entrada nesta xornadas así coma o 25 de xullo, Día de Galicia, e o 10 de agosto, festividade de San Lourenzo, a quen está adicado o templo.

O horario de visita ao mosteiro a día de hoxe, ata a entrada en vigor do estival, é de 11:00 a 14:30 e de 16:30 a 19:00 horas, de mércores a dimingo. En canto se incorpore a nova persoa que se contratará como guía turístico a través da subvención da Deputación de Pontevedra (para atención do Punto de Información da Rede Info Rías Baixas), aplicarase o horario de verán con apertura ata máis tarde.

Máis de 1.600 visitas en abril

Por outra banda, o mosteiro de Carboeiro recibiu unha un total de 1.630 visitas o pasado mes de abril, unha cifra moi boa que segue a confirmar o mosteiro e o seu entorno como un dos enclaves con máis visitas do interior da provincia. O perfil turístico caracterízase por ter unha maioría de mulleres de entre 35 e 65 anos que se achegaron no seu vehículo particular e coa familia ata o antigo cenobio, despois de facer unha busca na rede e atopar dito monumento.

 PUBLICIDADE

Se queres obter máis información do evento preme na imaxe.

Ademais, tamén houbo unha pequena porcentaxe (9%) de visitas que chegou a pé, pois viñeron paseando polo Sendeiro do Deza, que comunica a Fervenza da Toxa co Mosteiro, ou dende o Balneario situado ó outro lado do río. En canto á orixe, a maioría foi de procedencia galega (78%), sendo en gran parte das provincias de Pontevedra e A Coruña, e se concretáramos un pouco mais das grandes cidades como Santiago de Compostela (188 pax) e Vigo (164 pax). No tocante ó resto de España (264 pax), Madrid foi a comunidade de onde procedían a maioría dos e das turistas. Finalmente, do extranxeiro (77 pax) visitaron Carboeiro persoas procedentes de lugares como Arxentina, Holanda, Italia, Portugal, India, Francia ou México entre outros.

 PUBLICIDADE

Preme para obter máis información.

O mosteiro batiu ademais récord esta Semana Santa, recibindo a preto de 700 persoas durante as xornadas festivas.