Ofrecerá un amplo repertorio con música de diferentes épocas e estilos
Laura Moure/Silleda
Este sábado día 6 a música clásica volta á igrexa do Mosteiro de Carboeiro, en Silleda. A cita enmárcase dentro do prestixioso curso de verán “Tamara Brooks” que se está a celebrar dende o pasado día 29 de xullo na localidade pontevedresa de Tui. O concerto de música clásica reunirá a preto de medio centenar de alumnos/as e profesores do 33 Curso de Verán de Dirección, Canto, Coro e Orquestra. A cita será ás 19:00 horas, con entrada de balde.
Este curso de verán, que dende 2016 toma o nome da prestixiosa directora de orquestra estadounidense falecida en 2012, conta nesta trixésimo terceira edición coa participación de destacados profesores e profesoras.
Así están presentes Julio Domínguez, director do coro de música clásica Camerata ad Libitum, que organiza este curso, Eduardo G. Novelli, responsable de estudios corais da prestixiosa Universidade de Kansas; Alexandra Tarniceru, Carmen Subrido, Juan Abalde; Gloria Novoa, Arabel Moráguez, a pianista Rosa Biveineine ou Vitor Lima, enter outros. “Unha vez máis o mosteiro de Carboeiro e a súa beleza volverán a fundirse coa música clásica grazas a este concerto”, sinala a concelleira de Cultura e Turismo Mónica González, que agradece aos organizadores do curso que elixiran o mosteiro silledense un ano máis para un dos seus concertos deste ano.
Dende o Concello convídase tanto ás formacións musicais e corais coma aos veciños en xeral a asistir a este concerto, “no que contaremos coa presenza de destacados músicos e directores”, engade.
Comments