O galaico Iván Sangiao, o primeiro galego en entrar no top 10 do Campionato de España Ultra

Ecos da Comarca/Deza

O galaico Iván Sangiao participou desde o venres no Ultra Sanabria, que foi Campionato de España Ultra por etapas, organizado pola Federación Española de Deportes de Montaña e Escalada. A proba abarcou tres etapas que sumaron un total de 114 quilómetros, con 6.000 positivos, polo que a particularidade que ten é tratar de manter o equilibrio e a enerxía para poder chegar a meta na terceira etapa.

A primeira etapa, con 32,6 quilómetros e 1.875 positivos, era máis técnica, cun ascenso moi longo onde se acumulaban 1.000 positivos e que rematou cun tempo de 3 h 47’ 47’’. “Esta era a proba que máis me favorecía, porque nos terreos técnicos é onde mellor me desenvolvo, pero sobre o quilómetro 22 empecei a ir incómodo por unha molestia nos pés, provocada pola entrada de arenas”, explica Sangiao.

A segunda etapa (41,39 km con 1.833 positivos) alternaba tramos moi rápidos con ascensos e descensos máis técnicos, que eran “as zonas nas que máis cómodo me sentía. Tratei de manter o ritmo e co obxectivo de entrar no top 10”, indica. O deportista do Galaico Trail Run finalizou esta etapa cun tempo de 4h 22’ 03’’

Xa o último día, completábase a proba con 32 km e 1.158 positivos, con zonas moi técnicas. “Cos pés aínda danados, sufrín durante todo o tramo e incluso tiven unha caída, pero finalmente cheguei a meta con moito orgullo e tratando de dar o mellor de min”, narra o deportista galaico. Finalmente, rematou esta etapa en 3h 17’ 05’’ e no cómputo total do

Campionato fixo un tempo de 11h 26’ 55’’.

Preme na imaxe se quere contactar connosco.

Sangiao rematou as tres etapas cun 8.º posto na clasificación xeral do Campionato de España e un 6.º na súa categoría (sénior), polo que cumpriu o obxectivo de formar parte do top 10, ademais de que foi o primeiro galego en entrar na primeira parte da táboa clasificatoria. “Estou moi contento por min e polo equipo, polo traballo ben feito e por haber gozado de cada zancada na montaña”, conclúe.

Desde o GTR destacan "a dureza desta proba, na que hai que estruturar un bo ritmo para

cada unha das etapas e felicitamos a Sangiao polo resultado acadado e por deixar ao club en tan boa posición".

Pola súa banda, Juan Varela participou esta fin de semana no Trail Monte Comado (Concello de Barreiros), que abarcaba o sábado ½ KV e o domingo 27 km con +1.400 metros acumulados de desnivel positivo. O galaico destaca a boa organización deste evento deportivo.