Laura Moure/Vila de Cruces
O Concello de Vila de Cruces anuncia axudas para levar a cabo as festas nas distintas parroquias que contarán cun investimento total de algo máis de 40.000 euros.

"Dende que Julio López asumiu a concellería de Cultura, Turismo e Deporte, sempre quixo favorecer os intereses de todos os veciños e veciñas de Cruces, algo que foi moi complicado, ao ter unha oposición que durante estes catro anos só se dedicou a desbaratar os plans do concelleiro non aprobando novos orzamentos e dilatando non tempo todas as actuacións ao ter que levar proxectos por separado, pero Julio López non só conseguiu mellorar as axudas ás asociacións culturais e deportivas ao longo deste mandato, senón que agora increméntao con axudas económicas a todas as parroquias de Vila de Cruces para realizar os seus festexos", informa o Concello.
O tenente de alcalde e responsable de Cultura e Turismo de Vila de Cruces, Julio López, propón facer un investimento total de máis de 40.000 euros, que se destinarán a recuperación das axudas ás festas patronais de cada parroquia, así como a concesión de axudas por valor de case 44.000 euros, dos cales 10.300 destínanse á promoción cultural e 33.300 para o fomento do deporte.
López solidarízase de este xeito "con todos os valentes que forman as comisión de festas e que cun gran traballo durante todo o ano conseguen celebrar os seus festexos, un festexos que cada vez teñen máis papeleo e burocracia, e pola contra, cada vez menos participación económica dos veciños, debido a continua subida dos prezos que fan que as familias perdan poder adquisitivo e que teñan que decidir priorizar os seus gastos". Ademais, e segundo Julio López "este é o momento de axudalos, xa que estas festas son motivo de reunión e unha tradición que non se debería de perder".
Así mesmo o tenente de alcalde asegura "que esta proposta de inversión ten como obxectivo principal contribuír ao benestar e desenvolvemento da comunidade de Vila de Cruces, unha vila que conta cunha rica tradición cultural e deportiva, así como cun gran potencial turístico. Con estas accións, o Concello pretende fomentar a participación dos veciños e veciñas nas actividades culturais, deportivas e educativas da vila, ademais de mellorar a súa calidade de vida en todos os aspectos".
Comments