O Concello do Pino celebra o sábado 13 de setembro a IV Festa da Familia Papaventos

O programa inclúe obradoiros, xogos populares, festa holi e un completo cartel de espectáculos

Laura Moure/O Pino

A área recreativa da Madalena converterase o sábado 13 de setembro no escenario da cuarta edición da Festa da Familia Papaventos, unha celebración organizada polo Concello do Pino e pensada para que persoas de todas as idades gocen dunha tarde de convivencia e diversión en contacto coa natureza.

A programación dará comezo ás 16:00 horas cun espazo lúdico no que non faltarán os xogos populares, os obradoiros en familia e a sempre esperada festa holi, que encherá de cor a carballeira. Trátase dunha oferta pensada para compartir risas e experiencias entre pequenos e maiores, reforzando o espírito participativo que caracteriza a festa.

 APOIO AO XORNALISMO PALESTINO

ECOS DA COMARCA APOIA AO XORNALISMO PALESTINO. Preme na imaxe para máis información.

Espectáculos para rir, sorprenderse e emocionarse

O apartado artístico abrirase ás 16:45 horas coa compañía A Farra Xous e o seu espectáculo de clown Bambolina, no que dous pallasos convidan ao público a mergullarse nas súas aventuras cheas de humor absurdo e tenrura.

A continuación, ás 18:00 horas, será a quenda de Facendo o indio, da compañía Galitoon, unha proposta chea de accións disparatadas e participación do público que repasa á súa maneira a cultura das tribos indias americanas.

Publicidade

Preme na imaxe se queres contactar connosco.

A festa pecharase ás 20:00 horas co Galerock’N’Magic do Mago Teto, un espectáculo que combina música en directo, humor e maxia para facer un percorrido pola historia musical galega, desde o Xabarín Club ata os grupos máis actuais.

Unha festa que xa é referencia no calendario

A Festa da Familia Papaventos consolidouse ao longo das súas catro edicións como unha das citas máis queridas do calendario lúdico do Pino. O evento combina xogos de sempre e espectáculos innovadores, converténdose nunha ocasión perfecta para compartir tempo en familia e gozar dunha entretida xornada.