O Concello de Sobrado abrirá no verán a ludoteca para favorecer a conciliación familiar

Poderán asistir os cativos de tres a 12 anos e hai prazas limitadas

Laura Moure/Sobrado dos Monxes

O Concello de Sobrado informa que coa chegada do verán tamén chega a ludoteca. Un espazo de lecer dirixido aos cativos e que permitirá favorecer a conciliación familiar ao longo do periodo estival.

Esta iniciativa desenvolverase dende o 1 de xullo ao 31 de agosto en horario de 10:00 a 13:30 horas. E está dirixida a nenos de tres a 12 anos. As prazas son limitadas e as solicitudes poderán presentarse na Casa do Concello ata o 25 de xuño. Terase en conta a orde de inscrición e terán preferencia os cativos empadronados

Esta proposta está subvencionada pola Consellería de Emprego e Igualdade e a Unión Europea.