A estrada nacional cortase mañá venres pola tarde e estarao ata a madrugada do luns con motivo das Festas de Verán
Laura Moure/Silleda
A estrada N-525 ao seu paso pola localidade da Bandeira (Silleda) volverá pecharse ao tráfico un ano máis con motivo das Festas de Verán. O Ministerio de Fomento aceptou a solicitude formulada dende o Concello para proceder ao corte entre hoxe, venres día 19 ( a partir das 16:00 horas) e ata a madrugada do vindeiro luns 22. Dende o goberno municipal agradécese á Administración central que volvan permitir o desvío do tráfico, unha medida moi necesaria por motivos de seguridade dada a gran afluencia de persoas que se achegan durante estes días á localidade.
Así mesmo, e ao igual que en anos anteriores, faise un chamamento á colaboración cidadá lembrando que está prohibido aparcar en todas as rúas nas que se habilitará o desvío (Fernando Penoucos, rúa do Parque e o tramo de Ramón de Valenzuela). Solicítase a colaboración cidadá para respectar as sinais de tráfico e lograr que as festas transcorran sen contratempos.
Ademais de bandos informando dos cortes tamén se colocarán avisos para lembrar aos veciños e visitantes a prohibición de estacionar nas rúas nas que se habilita o desvío durante as tres xornadas.
Tamén dende hoxe e ata a madrugada do luns quedarán cortadas ao tráfico, ademais da rúa Xeral, o tramo entre rúa da Empanada e rúa Lavadoiro; a rúa Lourás (no tramo dende a rúa do Parque ata a Xeral) ; e todas aquelas rúas que rodean a praza da Feira.
Por outra banda e como vén sendo habitual nos últimos anos, o luns día 22 será xornada de festivo local no municipio de Silleda con motivo das Festas de Verán da Bandeira.
Comments