top of page

O Concello de Silleda inicia novas obras de mantemento na Escola Infantil A Galiña Azul

Cunha inversión de máis de 20.000 euros, cambiaranse todos os cuartos de baño do centro para adaptalos ás nenas e nenos e mellorar a súa aprendizaxe e autonomía


Laura Moure/Silleda

Esta semana deron comezo novos traballos de reforma e mantemento da Escola Infantil A Galiña Azul de Silleda. O proxecto a executar conta cun orzamento de 20.320,80 euros, que servirán para adaptar a altura e a grifería de todos os lavabos do centro co fin de facilitar a aprendizaxe autónoma nas labores de hixiene persoal das nenas e nenos usuarios da gardería.


Así pois, nos aseos das dúas aulas de 0-1 anos, colocaranse lavabos novos a unha altura de 40 cm. dende o chan; e nas 4 aulas restantes, destinadas a nenos e nenas de 1-2 anos e 2-3 anos, recolocaranse os lavabos existentes a 45 centímetros do chan. Con estas alturas permitirase que as pequenas e os pequenos poidan alcanzar sen problema a grifería e usar eles solos os lavabos.

Por outra banda, ampliaranse o número de lavabos da zona de comedor para así garantir maior axilidade no traballo de limpeza de mans logo das comidas, recolocándose tamén os existentes a 45 centímetros de altura. Ademais, para mellorar o uso por parte dos cativos e das cativas do centro, toda a grifería colocarase nova, substituíndo as billas actuais por

uns elemento monomando que son moito máis fácil de abrir e pechar.


A execución destas obras supón tamén a modificación de parte do alicatado dos cuartos de baño e a modificación de todas as instalacións de abastecemento e saneamento en cada un dos recintos de aseos das seis aulas e tamén do lavabo da zona de comedor.


Estas reformas necesarias e agardadas pola comunidade educativa da Escola Infantil, foron adxudicadas polo Concello de Silleda a empresa local Endenor, e financiaranse a través dunha compensación económica co Consorcio Galego de Servicios de Igualdade e Benestar, xa que descontarase o importe das obras dos 70.000 euros que o Concello ten

obriga de abonar anualmente ao Consorcio polo servizo da escola infantil.


Publicidade

A concelleira de Educación de Silleda, Ángela Troitiño, destaca que “con esta nova colaboración co Consorcio galego se cubre unha nova demanda da comunidade educativa e se facilita o uso das instalación por parte das e dos pequenos a escola”, e recorda que o ano pasado xa se levaron a cabo reformas neste centro, co mesmo sistema de compensación económica, consistentes en impermeabilizar as cubertas, substituír os biombos por tabiques lixeiros (con aillamento exterior acústico e porta de paso corredeira), repoñer o caucho do patio interior e colocar nesta zona de xogos unha varanda de separación.


A Galiña Azul de Silleda rematouse de construír no 2011, e dende entón o Concello vense encargando de arranxar pequenas deficiencias e obras de conservación (pintado, arranxos varios….) ademais de abonar uns 70.000 euros anuais ao consorcio para que se poida ofrecer o servicio da escola infantil.

0 comentarios

コメント


IRS.gif
Copia de ¡TU Anuncio!.gif
Ecos_da_Comarca_neg.png
bottom of page