O Concello de Silleda e o SAREB anuncian a rehabilitación do edificio da avenida da Estación

As obras, que se iniciarán en breve, suporán a posta no mecado de 44 vivendas, outros tantos garaxes e un local na planta baixa

Laura Moure/Silleda

O Concello de Silleda e a Sociedade de Xestión de Activos Procedentes da Reestruturación Bancaria (Sareb) anunciaron a próxima recuperación e acondicionamento dun edificio situado na Avenida da Estación número 15 do casco urbano de Silleda. Con estas obras lograrase o obxectivo de finalizar as 44 vivendas, 44 garaxes e o local comercial da planta baixa que quedaron abandonados no ano 2008 tras o estourido da burbulla inmobiliaria, o que provocou o deterioro exterior e a vandalización do interior do edificio.

O edificio que se rehabilitará.

A alcaldesa de Silleda, Paula Fernández, celebrou a noticia destacando que "a recuperación deste inmoble, cun estado que estaba a xerar numerosos problemas de salubridade, é unha fantástica nova para o noso municipio", e engadiu que desde o goberno seguirán impulsando accións tanto neste como noutros inmobles da localidade que están en mans privadas.

Publicidade

Preme na imaxe se queres contactar connosco.

Unha das principais liñas de traballo da SAREB é potenciar a venda de activos residenciais ás administracións públicas, facilitando que estas poidan adquirir vivendas en condicións de compra preferentes. Por iso, o Concello e a Sareb continúan negociando para destinar vivendas a alugueiro social.

Así mesmo, recentemente a Sareb cedeu ao Concello o uso dunha finca situada no barrio de Campo para o seu uso como aparcamento.