O Concello de Silleda celebra por primeira vez o “Día dos Avós e das Avoas” cun encontro interxeracional

Será o 26 de xullo na Carballeira das Pedrosas

Laura Moure/Silleda

O Concello de Silleda organiza por primeira vez unha actividade específica para conmemorar o Día dos Avós e das Avoas, apostando por unha xornada de convivencia interxeracional, o respecto e o lecer compartido entre distintas idades. O “Día dos Avós e das Avoas” terá lugar o sábado 26 de xullo, de 17:00 a 20:00 horas, na Carballeira das Pedrosas, un espazo natural emblemático que acollerá unha tarde lúdica e participativa dirixida a toda a veciñanza.

Durante a tarde, as persoas asistentes poderán gozar de xogos tradicionais, pensados para fomentar a interacción entre avós, avoas, netos e netas, recuperando xogos populares e promovendo os valores da tradición e a transmisión xeracional. Ademais, haberá unha merenda gratuíta para todas as persoas participantes.

Publicidade

Preme na imaxe para obter máis información do evento.

Con esta iniciativa, o Concello quere recoñecer o papel fundamental que desempeñan os avós e as avoas nas familias e na sociedade, e ao mesmo tempo, crear un espazo de encontro entre xeracións, onde compartir experiencias, tempo de calidade e diversión.

A concelleira de Benestar, Ángela Troitiño, destaca que “é a primeira vez que organizamos unha actividade pensada especificamente para homenaxear os avós e avoas, e facémolo apostando por un formato interxeracional, no que tamén participen os máis novos da casa. Queremos crear espazos onde distintas xeracións poidan compartir tempo, lembranzas e sorrisos, reforzando así os vínculos familiares e comunitarios.”

Publicidade

Preme na imaxe se queres contactar connosco.

As actividades serán totalmente gratuítas, mais é necesario inscribirse previamente chamando ao 986 592 037.

Dende o goberno municipal anímase a toda a cidadanía a participar nesta primeira edición do certame, que nace coa vontade de consolidarse como unha cita anual dentro do calendario de actividades culturais e sociais do Concello.