Destacará a variedade, calidade e proximidade do comercio local
Laura Moure/Melide
O proxecto Dinamización do Comercio de Melide continúa levando a cabo accións de promoción e difusión do comercio local melidense. No marco desta iniciativa, que recibiu o ano pasado unha importante axuda por valor de 49.044,69 euros da Cámara de Comercio, Industria, Servizos e Navegación de España, recoñecéndoa como proxecto singular, en próximas datas o Concello de Melide lanzará una nova campaña titulada Melide Destino, os Domingos de Melide onde se porá en valor a calidade do comercio local.

Deste modo, e segundo sinalou o concelleiro de Promoción Económica, Xosé Igrexas, “ a
campaña destacará que en Melide temos todo o necesario para a compra de produtos
diversos, de forma rápida e de confianza”. No comercio local melidao, explicou o edil,
salienta a calidade dos produtos e a proximidade xeográfica para o comprador.
“Alimentación, téxtil, hostalería... Melide ten calidade en todo tipo de produtos e servizos
e, ademais, o feito de mercar aquí repercute positivamente na vida local”, engadiu.
Para o edil, “un comercio local forte tradúcese nunha vila con xente e con servizos, con
vida nas rúas e dinamismo social e cultural”. Neste sentido, Igrexas salientou que “a calidade indiscutible do proxecto Dinamización do Comercio de Melide impúxose sobre
ducias doutros proxectos a nivel estatal”, demostrando “a aposta forte que este Concello
fai pola economía local” como un alicerce chave para a recuperación social e económica
despois da pandemia.
Comments