É un taller presencial sobre autocoñecemento e saúde sexual dirixido a mulleres a partir de 45 anos, é gratuito, pero hai prazas limitadas
Laura Moure/Arzúa
O Centro de Información ás Mulleres do Concello de Arzúa e a Federación de Planificación Familiar SEDRA desenvolverán un novo obradoiro presencial sobre autocoñecemento e saúde sexual dirixido a mulleres a partir de 45 anos. Estes obradoiros están dirixidos a crear espazos de ensino e aprendizaxe grupal sobre a sexualidade e a saúde sexual, en relación aos seus aspectos físicos, biolóxicos e sociais.
Estes talleres terán como obxectivo aumentar os coñecementos das participantes en conexión coas súas propias vivencias; dar resposta ás súas inquietudes, normalizar diferentes situacións, e ofrecer unha base común que lles permita tomar decisións autónomas sobre a súa sexualidade e relacións, en base ao seu propio marco de valores.
Así mesmo, os talleres permitirán mellorar as súas actitudes cara á sexualidade, entendéndoa como unha dimensión humana fundamental, como unha realidade diversa e como un valor; e mellorará as súas habilidades de comunicación e negociación. Desta forma, contribuirase a un maior benestar por parte das mulleres, a unha maior prevención de riscos e, en definitiva, a un maior grao de saúde sexual. Os talleres suporán, ademais, un espazo de encontro que permita a posta en común de opinións e vivencias e, en moitas ocasións, a axuda mutua que redunda tanto na adquisición de habilidades por parte das mulleres, como na creación de redes de apoio.
Os contidos son:
• Concepto de sexualidade, saúde sexual e outras cuestións afíns.
• Autoestima e benestar.
• Momentos vitais clave.
• Entre a pel e a cultura; o sistema sexo-xénero.
• Anatomía e fisioloxía da sexualidade, a erótica e a reprodución.
• Hixiene e coidados. Maternidade.
• Prácticas conceptivas, aconceptivas e métodos anticonceptivos.
• Prevención de infeccións de transmisión xenital, buco-xenital e VIH.
• Relacións de parella. Mitos relacionados co amor romántico. Roles de xénero.
• Creación de relacións positivas e saudables.
• Sistema normalizado de atención á saúde. Recursos de proximidade.
O prazo para anotarse ata o 31 de outubro
O obradoiro constará de dúas sesións que se impartirán os mércores 2 e 9 de novembro na Aula Multiusos de Edificio Sociocultural María Mariño. A inscrición, que é gratuíta, debe formalizarse no Centro de Información ás Mulleres do Concello de Arzúa (Rúa Santiago, 2) ou chamando ao 981 501 101. As prazas son limitadas e o prazo para anotarse remata o 31 de outubro.
Comments