O Concello de Arzúa ofrece a segunda das excursións do programa 'Coñece o teu país'

Será o sábado 26 de xullo e visitarán Ribadeo

Laura Moure/Arzúa

O Departamento de Cultura do Concello de Arzúa informa da apertura do prazo de inscrición para a segunda das excursións do programa Coñece o teu país deste ano. Un ano máis, de maneira totalmente gratuíta, os veciños e veciñas poden realizar catro excursións ás catro provincias galegas.

Despois de coñecer máis de preto a localidade de Betanzos no pasado mes de xuño, a segunda viaxe será este sábado día 26 de xullo a Ribadeo.

Publicidade

Preme na imaxe para obter máis información do evento.

Nesta ocasión farase unha visita guiada con acompañamento de guía oficial ao barrio indiano de Ribadeo para coñecer o legado indiano de finais do século XIX e principios do XX que hoxe é unha parte esencial do atractivo turístico de Ribadeo. Máis de medio centenar de casas señoriais, con fachadas ornamentadas, xardíns tropicais e detalles arquitectónicos únicos, conviven con edificios emblemáticos, como escolas, unha praza de mercado, unha traída de augas e a Granxa Escola Agrícola Pedro Murias. O día completarase coa visita ao miradoiro da Atalaia, cun xantar ao carón da Praia das Catedrais e con tempo libre de praia pola tarde.

Publicidade

Preme na imaxe para obter máis información do evento.

Segundo se indica dende o Departamento de Cultura, todas as persoas interesadas en participar no programa deben achegarse persoalmente á Oficnia de Cultura e Deportes a partir de mañá, martes, 22 de xullo, podendo anotar como máximo a un acompañante por cada solicitante. As prazas dispoñibles iranse cubrindo por orde de inscrición, sendo as mesmas limitadas.