O Concello de Arzúa informa que está aberta a convocatoria de emprego do programa PEL

Inclúe catro prazas de peóns de servizos municipais e unha praza de auxiliar de biblioteca

Laura Moure/Arzúa

Concello de Arzúa informa de que desde o mércores 10 de abril, a veciñanza xa pode anotarse na nova convocatoria de emprego municipal, ao abeiro do programa PEL Concellos 2025 da Deputación da Coruña. O prazo estará aberto ata o martes 16 de abril (inclusive). A convocatoria inclúe catro prazas de peóns de servizos municipais e unha praza de auxiliar de biblioteca. A oferta está dirixida a persoas en situación de desemprego e pertencentes a colectivos con maiores dificultades de inserción laboral. Os contratos serán de duración determinada e a tempo parcial (29 horas semanais): cinco meses no caso dos peóns e tres meses para o posto de auxiliar de biblioteca.

O obxectivo da convocatoria é fomentar o emprego e reforzar os servizos públicos esenciais, como a limpeza viaria, a recollida de residuos e o apoio á biblioteca municipal. A selección realizarase por concurso no caso dos peóns e por concurso-oposición no caso do posto de auxiliar.

As persoas interesadas deberán cumprir cos requisitos establecidos nas bases, entre eles estar inscritas como demandantes de emprego e atoparse nalgunha das situacións de exclusión laboral ou social recollidas na convocatoria (mulleres, maiores de 45 anos, desempregados de longa duración, etc.).

Publicidade

Preme na imaxe se queres contactar connosco.

A documentación poderá presentarse tanto no Rexistro do Concello de Arzúa como a través da sede electrónica municipal: https://sede.concellodearzua.com

"Esta nova convocatoria reafirma o compromiso do goberno local coa promoción do emprego digno e a atención ás persoas que máis o precisan. Non se trata só de crear postos de traballo, senón de poñer os recursos públicos ao servizo da inclusión social e da mellora dos servizos municipais. ”, destaca o alcalde, Xoán Xesús Carril.

Desde o Concello de Arzúa convidan á veciñanza a informarse e participar deste proceso, lembrando que toda a información e as bases están dispoñibles na sede electrónica municipal e que poden achegarse ata o Concello para solicitar axuda ou máis información.