O Concello de Arzúa convoca un encontro aberto para asegurar o futuro do CSD Arzúa

Será na Aula CeMIT do Concello o luns 17 de febreiro

Ecos da Comarca/Arzúa

O CSD Arzúa atópase nun momento de cambio tras a decisión da súa actual directiva de deixar o cargo, sen que, polo de agora, exista unha alternativa que asuma a xestión do club. Conscientes da importancia desta entidade deportiva para o municipio, o Concello de Arzúa, a través da Concellería de Deporte, aposta por abrir un espazo de diálogo e traballo colectivo que permita atopar solucións e asegurar a continuidade do proxecto.

Por este motivo, convócase un encontro aberto á veciñanza, socios e persoas interesadas, que terá lugar na Aula CeMIT do Concello de Arzúa, o luns 17 de febreiro ás 20:00 horas. O obxectivo desta reunión é poñer en común a situación, escoitar propostas e facilitar a participación de todas as persoas que queiran contribuír ao futuro do CSD Arzúa.

Publicidade

Preme na imaxe para obter máis información do evento.

O Concello de Arzúa valora o CSD Arzúa como un elemento clave do deporte municipal, con impacto social e comunitario máis alá da competición. Por iso, desde a Concellería de Deporte traballarase para facilitar este proceso e apoiar as iniciativas que xurdan da propia veciñanza.

Fai un chamamento á participación de todas as persoas que sintan o CSD Arzúa como parte do seu patrimonio deportivo e social, coa certeza de que o esforzo conxunto será clave para atopar a mellor solución.

Publicidade    

Preme na imaxe se queres contactar connosco.

Para máis información, as persoas interesadas poden contactar coa Concellería de Deporte do Concello de Arzúa.