O Concello de Arzúa chama á participación na manifestación convocada por Queremos Galego!

Será o día 23 e para facilitar a asistencia, pon á disposición da cidadanía un servizo de autobús gratuíto

Laura Moure/Arzúa

A plataforma Queremos Galego!, da que fai parte o Concello de Arzúa xunto con colectivos, institucións e movementos sociais de defensa da lingua, convoca unha gran manifestación en Santiago de Compostela o domingo 23 de febreiro baixo o lema “Lingua vital xa! Paremos a emerxencia lingüística”. A mobilización partirá ás 12:00 horas desde a Alameda de Santiago e rematará na Praza do Obradoiro.

O Concello de Arzúa, como parte activa da plataforma, fai un chamamento á veciñanza para acudir a esta mobilización e esixir medidas urxentes que garantan a normalización e recuperación do galego. Para facilitar a asistencia, ponse á disposición da cidadanía un servizo de autobús gratuíto, que sairá ás 11:00 horas desde o aparcadoiro da Rúa de Lugo. As persoas interesadas poden inscribirse previamente chamando ou enviando un WhatsApp ao 626 798 291.

Publicidade

Preme na imaxe para obter máis información do evento.

A concelleira de Lingua, Lucía López, puxo de relevo a necesidade de mobilización social ante a situación de emerxencia que atravesa a lingua galega: "Os últimos datos do Instituto Galego de Estatística (IGE) confirman unha realidade preocupante: por primeira vez, hai menos galegofalantes ca castelanfalantes no noso país. Estes datos evidencian a urxencia de que, desde as institucións poñamos os medios necesarios para reverter esta deriva e garantir o futuro da nosa lingua. O galego é o maior patrimonio do pobo galego e cómpre protexelo con medidas concretas desde as institucións."

O alcalde de Arzúa, Xoán Xesús Carril, destaca a importancia do traballo conxunto dentro da plataforma Queremos Galego! e o compromiso adquirido hai meses: "Hai uns meses acadamos o compromiso de adherirnos á plataforma Queremos Galego. Fixémolo porque acreditamos no seu traballo e na necesidade de sumar esforzos para garantir o futuro do galego. Queremos Galego! é un espazo amplo, no que conviven centos de colectivos con diversas sensibilidades e formas de organización, pero cun diagnóstico común: só sumando forzas poderemos reverter a situación crítica que atravesa a lingua galega no país."

Publicidade    

Preme na imaxe se queres contactar connosco.

Desde o Concello de Arzúa reafírmase o compromiso con todas as iniciativas que defendan o galego e fomenten o seu uso na sociedade, e anímase a toda a veciñanza a participar activamente nesta mobilización.

Para máis información sobre a manifestación e os seus obxectivos, pódese consultar a web oficial da plataforma: www.queremosgalego.gal.