O Ciclo Mestre Mateo volve á provincia de Lugo e inclúe unha proxección en Monterroso

A Vicepresidencia da Deputación de Lugo financia o ciclo da Academia Galega do Audiovisual, que achega o cine en galego a vilas sen salas comerciais

Laura Moure/Monterroso

A deputada de Cultura Iria Castro e Lucía Regueiro,  membro da xunta directiva da Academia Galega do Audiovisual,  presentaron este mércores unha nova edición do Ciclo Mestre Mateo na provincia, o circuíto de cinema galego que achega as producións máis destacadas do audiovisual galego a concellos sen salas comerciais.

Os concellos da A Fonsagrada, Foz, A Pobra do Brollón, Monterroso, Taboada, Meira, Sarria e Vilalba acollerán as proxeccións desta nova edición do ciclo, que continúa achegando o audiovisual galego a vilas sen salas comerciais e reforzando a rede cultural da provincia. Nesta edición, o público poderá ver as catro películas de ficción e os catro documentais finalistas dos Premios Mestre Mateo 2026: Sirât, As liñas descontinuas, Antes de nós, San Simón, 360 curvas, O son da nova regueifa, Deuses de pedra e O silencio herdado.

O apoio da Deputación foi clave para o éxito da iniciativa nestes catro anos, nos que se levaron a cabo 232 sesións de cinema, que reuniron un total de 6.010 espectadores e espectadoras. Estes datos consolidan o ciclo como un dos proxectos culturais con maior implantación territorial na provincia de Lugo. Nesta liña, Lucía Regueiro sinalou que "estamos seguros de que a calidade das películas seleccionadas nesta edición 2026 e a resposta do público darán continuidade a estes excelentes resultados de asistencia".

Iria Castro valorou "a continuidade deste ciclo que puxemos en marcha da man da Academia Galega en 2022 para achegar o audiovisual en galego a vilas que non contan con salas comerciais. Abrimos novas canles de difusión para as producións en galego, achegando a elas un público moi heterexéneo, mais aló dos espectadores e espectadoras que acuden habitualmente ás salas de cine"

A responsable de Cultura explicou que "o ciclo de proxeccións dá continuidade a un ano en que Lugo foi centro do audiovisual galego, coa celebracion na cidade da gala dos Premios Mestre Mateo" e destacou "a ampla representación de profesionais das comarcas de Lugo na factura das películas e documentais que se proxectarán, como finalistas dos Premios Mestre Mateo nestas categorías"

 PUBLICIDADE

Preme para obter máis información.

Pola súa parte, Lucía Regueiro destacou que "unha cuestión importante para a Academia é a conexión do público co cinema que se produce actualmente en Galicia. Por iso, un dos obxectivos principais do Ciclo Mestre Mateo é facilitar ás persoas o acceso a unha programación de cinema galego actual e de calidade e, moi especialmente, a todas aquelas que non contan cunha oferta de cinema comercial nas súas vilas".

O Ciclo Mestre Mateo, creado pola Academia Galega do Audiovisual en 2022 co apoio da Área de Cultura da Deputación de Lugo e replicado logo noutros ámbitos xeográficos, consolidouse como un proxecto clave para levar o cinema galego de calidade a vilas sen salas comerciais, creando unha rede de exhibición en centros culturais, auditorios e bibliotecas por toda Galicia. Ao longo das súas edicións, o ciclo contribuíu a facer accesibles producións destacadas do audiovisual galego, superando as limitacións dos circuítos comerciais e reforzando o vínculo da cidadanía co seu propio cinema.

 PUBLICIDADE

Preme na imaxe e contacta con nós!

O proxecto conta coa colaboración dos colectivos culturais M de Meira, IESCHA de Vilalba, Falcatrueiros de Monterroso, Petapouco e a Destempo da Fonsagrada,   A Unión de Sarria e dos concellos da Pobra do Brollón, Taboada  e Foz, que organizan a programación das proxeccións. As datas e horarios actualízanse en ciclomestremateo.gal