O BNG reclamará no Parlamento que se cubran as baixas dos profesionais de saúde mental en Lalín

Ecos da Comarca/Lalín

A deputada nacionalista Ariadna Fernández denunciará no Parlamento Galego "a precarización do servizo de saúde mental de Lalín, con primeiras consultas e revisións que acumulan meses de atraso por falla de cobertura das incapacidades temporais dos profesionais".

Nas pasadas semanas varios doentes trasladáronlle ao BNG de Lalín as situacións que se están a vivir en canto ao servizo de Saúde Mental do CIS, onde o persoal de psicoloxía se atopa en situación de incapacidade temporal sen que dende o SERGAS se proceda á cobertura desa baixa. É por este motivo que moitas persoas citadas para estes meses recibiron a notificación, en algúns casos o mesmo día, de que non poderían ser atendidas.

Publicidade

Preme na imaxe para obter máis información do evento.

"A gravidade do asunto reside na falla de compromiso do goberno galego coa sanidade pública do país, obrigando á poboación a recorrer á sanidade privada no caso de poder permitirse esa escolla. Nos casos nos que non é así, no noso concello as citas para primeiras consultas demóranse durante máis de medio ano e as revisións dos

tratamentos non se lévana a cabo en tempo e forma, de maneira que non se está ofertando un servizo con garantías á veciñanza de Lalín, agravándose en moitos casos os

procesos. Isto sería innecesario se dende a Consellería de Sanidade reforzasen o servizo de saúde mental no CIS lalinense, algo que non ocorre, e que ocasiona que a situación

sexa crítica nos casos nos que os profesionais que desenvolven a súa labor no centro de

saúde non se atopen en disposición, sexa cal sexa o motivo", lamenta o Bloque.

Publicidade

Preme na imaxe para obter máis información do evento.

Dende o BNG a deputada Ariadna Fernández anuncia que acaban de rexistrarse iniciativas parlamentares ao respecto para debater na comisión 5 de Sanidade, coa intención de que as prazas se reforcen, coma xa se ten solicitado en anteriores ocasións

dende o BNG de Lalín e que as incapacidades temporais e as vacacións se cubran, garantindo a atención adecuada aos veciños e veciñas, que agora se atopan nunha situación de desleixo total por parte do goberno galego.