O BNG reclama un plan urxente de hidrolimpeza para as beirarrúas de Silleda e da Bandeira

Ecos da Comarca/Silleda

O grupo municipal do BNG de Silleda vén de presentar unha moción para o seu debate no pleno ordinario do mes de maio na que reclama ao goberno local a posta en marcha dun plan urxente de hidrolimpeza en profundidade das beirarrúas dos cascos urbanos de Silleda e da Bandeira.

A iniciativa chega tras constatar o estado xeneralizado de sucidade e deterioro superficial das beirarrúas, especialmente tras os meses de inverno, nos que se acumularon manchas, barro e residuos que afectan á imaxe dos espazos públicos. Nos últimos días, o BNG tamén levou a cabo unha campaña de acción directa en distintas rúas das vilas, realizando limpezas con auga a presión en varios puntos.

Estas intervencións permitiron evidenciar tanto o nivel de sucidade existente como a

viabilidade dunha limpeza eficaz, deixando ademais visibles mensaxes por contraste

entre a zona limpa e a sucia, como “zona libre de limpeza municipal” ou “concello

ausente, sucidade presente”.

 PUBLICIDADE

Se queres obter máis información do evento preme na imaxe.

A voceira municipal do BNG, Erea Rey, sinala que “quixemos demostrar con feitos o que calquera veciño pode comprobar a diario: as beirarrúas están sucias e pódense limpar, pero falta vontade política para facelo”. Rey engade que “é especialmente grave que en moitos casos sexa a propia veciñanza quen teña que asumir esta tarefa ante a inacción do Concello”.

Desde o BNG lembran que boa parte da sucidade existente é incrustada, polo que non

pode ser eliminada cos medios ordinarios e require o uso de maquinaria específica de hidrolimpeza a presión. A través desta moción, o BNG propón que o Concello execute un plan que abranga a totalidade das rúas e zonas peonís, priorizando as máis afectadas, e que ademais se estableza un calendario periódico de mantemento para evitar que esta situación se repita.

 PUBLICIDADE

Preme para obter máis información.

Erea Rey insiste en que “Silleda merece uns espazos públicos coidados e á altura do que representa o noso concello, e iso pasa por unha planificación seria e continuada”. A voceira nacionalista conclúe que “fronte á pasividade do goberno, o BNG actúa e propón solucións concretas para solucionar un problema que é evidente”.