O BNG reclámalle á Sareb a cesión permanente e gratuíta dos terreos que ten en Silleda

O Bloque desta localidade lamenta que o goberno local "oculte información sobre o convenio" e pídelle que "sexa máis ambicioso" e esixa esta cesión

Ecos da Comarca/Silleda

O Grupo Municipal do BNG de Silleda vén de presentar unha moción para o seu debate

no próximo pleno ordinario, previsto para o día 26 de setembro, na que reclama á

Sareb a cesión gratuíta, permanente e irrevogable dos terreos que a sociedade ten no

termo municipal de Silleda. Así mesmo, tamén reclama que a SAREB e o Concello

cheguen a un acordo que permita que as vivendas en bo estado de habitabilidade que

ten a primeira en Silleda poidan ser ofrecidas en alugueiro.

Dita solicitude prodúcese logo de facerse público o convenio asinado en agosto entre o

Concello de Silleda e a Sareb, polo que esta última cedía temporalmente o uso dun

solar no Barrio do Campo para o seu uso como aparcadoiro, acordo que os nacionalistas

cualifican como "pouco ambicioso".

Desde o BNG chaman a atención sobre o feito de que na comunicación feita pública polo goberno municipal non se mencione que se trata dunha cesión non gratuíta, xa que o Concello comprométese á devolverlle á Sareb o importe anual do IBI de ditas parcelas. Ademais, o convenio establece claramente que a duración do mesmo será ata o 31 de xullo de 2025, indicando que o contrato quedará “automaticamente resolto” nesa data, polo que tampouco se entende que "o goberno minta", anunciando que se trata acordo “prorrogable por anualidades”.

Publicidade

Preme na imaxe para obter máis información.

Ademais, desde o BNG advirten que a Sareb resérvase o dereito a resolver o contrato unilateralmente en calquera momento, sen ofrecer ningunha compensación ao Concello, polo que podería darse unha situación onde o Concello tivese que devolver o terreo no medio da cesión, logo de ter realizado uns investimentos en adecuar o acceso e o interior do terreo para o seu uso como aparcadoiro. Nesa liña, desde o BNG piden ao goberno que faga público cal é o custo para as arcas municipais que están tendo os traballos para adecuar o interior da parcela e instalar un valado.

A moción presentada polo BNG, recorda que a Sareb é unha sociedade participada

maioritariamente polo Estado e que os seus bens foron adquiridos polos contribuíntes

mediante a emisión de débeda avalada polo Estado, polo que os terreos dos que dispón

deberían ser transferidos ao Concello de Silleda con carácter permanente e a título gratuíto.

Publicidade

Preme na imaxe se queres contactar connosco.

Nese sentido, tamén se reclama que o Concello de Silleda se dirixa ao Goberno do

Estado, pedindo un cambio na política de xestión de activos inmobiliarios da Sareb que poña o foco no aproveitamento público das vivendas e terreos dos que é titular, en lugar de destinar ditos inmobles a ser poxados a fondos de investimento inmobiliario, pouco preocupados polo interese público.