Ecos da Comarca/Silleda
O BNG de Silleda denuncia unha vez máis "a preocupante situación na que se atopan
as instalacións do centro de saúde da vila". Así, os nacionalistas denuncian a existencia
de filtracións de auga e aire a través das fiestras, o que causa que a auga teña que ser
recollida mediante cubetas e toallas do Sergas e afectando á temperatura ambiental no
interior do centro.
Tamén denuncian que as filtracións están provocando unha serie de humidades nas paredes, e alertan dos problemas que esas humidades poden causar tanto á saúde dos
usuarios; como á propia estrutura do edificio.

Esta situación do Centro de Saúde de Silleda foi xa denunciada en abril de 2024 polo
BNG no Pleno municipal, mediante a presentación dunha moción que foi aprobada por maioría. Na mesma, instábase ao goberno municipal a remitir un informe á Consellería de Sanidade, informando das deficiencias detectadas no mantemento e demandando á Xunta de Galiza a que acometese as obras de mellora precisas, incluíndo unha reforma urxente da rampla de acceso, "que resulta moi esvaradía os días de chuvia".
A modo de exemplo da necesidade urxente destas obras, desde o BNG apuntan "o caso
dunha usuaria que este mesmo mes fracturou unha man logo de esvarar na rampla de
entrada".
Publicidade
Visto que a situación segue igual que hai un ano, o BNG vén de presentar no Parlamento
Galego, por medio dunha iniciativa rexistrada pola deputada Ariadna Fernández, unha
batería de preguntas, para saber se a Xunta ten constancia das deficiencias que presenta o centro así como do accidente recentemente sufrido por unha usuaria. Así mesmo, tamén presentou unha Proposición non de Lei para instar á Xunta a cumprir as súas obrigas de mantemento da instalación e dotalo dun acceso adecuado.
“Os centros de saúde reciben principalmente persoas con dificultades de mobilidade e diversas patoloxías que teñen que ter un acceso adecuado e sen perigos,” recalca Ariadna Fernández, que pide á Xunta celeridade en resolver a situación.
Comments