O BNG denuncia "o veto do PP" para lograr o arranxo da ponte da estrada de Maroxo en Arzúa

Salientan a incoherencia do Partido Popular que vota en contra no Parlamento galego despois de terse pronunciado a favor no pleno municipal

Ecos da Comarca/Arzúa

Unha vez concluído o trámite parlamentario do proxecto de Orzamentos da Xunta de Galiza para o ano 2026, o BNG denuncia o voto en contra do Partido Popular a todas as emendas formuladas pola formación nacionalista “nun exercicio claro de absolutismo e falta de diálogo”, salienta Iria Carreira, deputada no Parlamento galego.

Nomeadamente, desde o BNG lamentan o voto en contra da emenda que buscaba introducir unha partida específica para a reconstrución da ponte caída sobre o río Iso na estrada a Maroxo. Un voto en contra que se produce só uns días despois de que o mesmo Partido Popular votase a favor da moción defendida polo BNG no pleno municipal deste mes de decembro onde se recollía a petición dunha dotación singularizada para esta infraestrutura.

 Publicidade

Preme na imaxe para obter máis información.

Desde a formación nacionalista denuncian que esta “é unha mostra máis da incoherencia do Partido Popular e unha evidencia da falta de interese real por solucionar os problemas diarios da veciñanza arzuá”, apunta Lucía López, voceira municipal do BNG. Segundo salienta, “esta é unha infraestrutura importante para o noso rural, onde o concello fixo o seu traballo mais coa que cómpre que outras administracións colaboren economicamente”. Ademais, López remarca que “o señor Rivadulla terá que dar explicacións ante a veciñanza de Arzúa desta falta de coherencia do Partido Popular e de por que os seus compañeiros no Parlamento galego votaron en contra dun investimento tan necesario”.

Publicidade

Preme para contactar con nós e pregunta polas tarifas que son unha bicoca!

Outras cuestións específicas de Arzúa que ficaron excluídas dos Orzamentos da Xunta de Galicia para o 2026 polo voto en contra do Partido Popular son investimentos singularizados para unha reforma integral do CEIP de Arzúa, a pesar de que tamén neste caso o PP de Arzúa tivera votado a favor desta cuestión no pleno municipal; para o incremento de chan industrial no municipio ou para a rehabilitación do complexo deportivo de Portodemouros.