O BNG defende que os nenos de Arzúa "merecen xogar" e propón cubrir o parque infantil da feira

Ademais pretende dotalo de fontes de auga e impulsar outros espazos de xogo para os menores

Ecos da Comarca/Arzúa

O candidato do BNG á Alcaldía de Arzúa, Xoán Xesús Carril, defendeu este luns que o goberno municipal do BNG en Arzúa impulsará a cobertura do parque infantil da Feira, dotaráo de fontes de auga potábel e impulsará outros espazos de xogo porque “as nenas e nenos de Arzúa merecen xogar e poder facelo todo o ano, independentemente das condicións climáticas” explicou Carril.

Preme na imaxe se queres obter máis información deste evento.

“No BNG temos un proxecto de concello que non esquece ás crianzas, cunha perspectiva do espazo público que debe ser inclusiva, humanizada e amábel coas nenas e nenos, por iso impulsaremos máis espazos para o encontro e o lecer das e dos máis pequenos e as súas familias”.

Preme na imaxe se queres contactar connosco.

O deporte desde a base: centro das políticas do BNG

Ademais, desde o BNG sinalan que “desde a Alcaldía de Arzúa impulsaremos a cobertura das pistas deportivas e resolveremos o problema que hai actualmente co acceso ás instalacións deportivas, o que está facendo que as nosas veciñas e veciños teñan que marchar practicar deporte a outros concellos”. “Desde o BNG defendemos o deporte de base en todas as disciplinas como un piar fundamental da nosa sociedade, por iso desde o goberno municipal melloraremos as instalacións deportivas, moi deterioradas e abandonadas nos últimos anos, e automatizaremos o acceso ás mesmas, facilitándoo e modernizándoo, como xa está a facerse noutros concellos referencia gobernados polo BNG,” concluíu.