O BNG de Silleda denuncia "a falta de control" nas obras da Avenida Recinto Feiral á saída do colexio

Ecos da Comarca/Silleda

O BNG de Silleda alerta "da situación de descontrol que se está a dar na contorna do CEIP de Silleda, por mor da coincidencia da realización de obras coa horario de saída e entrada do alumnado". Os concelleiros do BNG puideron comprobar in situ "a situación de descontrol e falta de seguridade que se vive durante o horario de saída, cando se realizan traballos de corte de pedra cunha radial que levantan grandes cantidades de po no aire, ao mesmo tempo que están a circular coches pola rúa -aínda en obras- mentres hai maquinaria pesada en movemento".

Fonte: BNG de Silleda.

Así quedou recollido nun vídeo feito público onte mesmo nas redes sociais do BNG de Silleda, co cal queren denunciar "a falta de medidas de seguridade e control por parte do goberno municipal, á vez que lle piden que actúe con máis responsabilidade, por tratarse de obras que se están a desenvolver ao carón dun centro de ensino en funcionamento".

Compre lembrar que a empresa adxudicataria levou a máxima puntuación por parte da Mesa de Contratación nos criterios subxectivos de valoración, entre os que se incluían a “circulación apropiada de persoal e maquinaria pola obra” así como a “organización física da obra”, "criterios que como se pode comprobar non se están a cumprir na práctica", sinala o Bloque.

Publicidade

Preme na imaxe se queres contactar connosco.

Desde o BNG recordan a crítica que xa fixeron en anteriores Plenos ao exceso de peso que teñen os criterios subxectivos á hora de adxudicar as obras, sen que logo exista unha supervisión real por parte do goberno durante a realización das mesmas.