O BNG de Lalín solicita que se recupere a celebración da Gala do Deporte Municipal

"Buscamos a visibilización do deporte base e do talento que existe en Lalín", recalca Manuel Carbón

Ecos da Comarca/Lalín

O Bloque Nacionalista Galego de Lalín vén de solicitar ao goberno municipal que retome a celebración da Gala do Deporte Municipal, un evento que consideran esencial para recoñecer o esforzo, a dedicación e os éxitos das persoas e entidades deportivas deste concello.

O responsable de Organización do BNG, Manuel Carbón, critica que "hai xa tres anos que non se organiza dito evento cando foi durante anos unha cita destacada no calendario local, servindo como espazo de encontro entre clubs, deportistas, familias e a veciñanza en xeral, e contribuíndo á visibilización do deporte base e do talento que existe en Lalín. A súa desaparición nos últimos anos supón un baleiro no recoñecemento institucional a quen

traballa día a día por fomentar valores como a constancia, o traballo en equipo e o

compromiso".

Publicidade

Preme na imaxe para obter máis información do evento.

Desde o BNG consideran que a recuperación desta gala non só sería un xesto de xustiza co tecido deportivo local, senón tamén unha ferramenta útil para seguir promovendo hábitos saudables e o espírito de comunidade. Por iso, instan os nacionalistas ao goberno local a organizar este evento con criterios de transparencia, promoción e participación.

Ademais, Carbón propón que a organización da gala se faga contando coa colaboración

dos clubs e entidades deportivas, para que o formato, os premios e as actividades

respondan ás necesidades e intereses do sector. "O deporte é unha parte fundamental da vida social e cultural de Lalín, e desde o BNG seguiremos traballando para que reciba o apoio e recoñecemento que se precisa e que gañou a pulso polo magnífico traballo que se leva realizando ao longo de moitos anos desde os distintos clubes deportivos".

Publicidade

Preme na imaxe se queres contactar connosco.

Remata o nacionalista facendo un ofrecemento sen condicións ao Goberno Local, para

sentarse a consensuar en positivo e coa mellor das aptitudes posibles, as condicións, normas, datas, etc "que fagan posible que este evento xente de novo un referente e un

orgullo para a nosa vila".