O BNG de Lalín reclama actuacións urxentes na Rúa da Ponte tras escoitar as queixas da veciñanza

"Non pode haber cidadáns de primeira e de segunda en Lalín", sinala Paco Vilariño

Ecos da Comarca/Lalín

Representantes do Consello Local do BNG de Lalín mantiveron este pasado luns unha reunión coa veciñanza da Rúa da Ponte (do tramo onde atravesa o río), na que recolleron numerosas queixas polo estado de abandono que sofre esta importante vía de entrada ao núcleo urbano. Os residentes trasladaron a súa preocupación pola deterioración das beirarrúas, a presenza de fincas sen desbrozar (tanto a nivel público como particular), a falta de mantemento do Rego dos Valados, que cruza a rúa e desemboca no río Pontiñas, e a situación do sendeiro que conecta coa zona do supermercado Mercadona, mal estado do mobiliario urbano, etc.

Segundo denuncia, e o BNG constatou a realidade das demandas veciñais, as beirarrúas presentan fochancas, desniveis e zonas levantadas que supoñen un perigo para peóns, especialmente persoas maiores ou con mobilidade reducida. "Ademais, o rego atópase totalmente obstruído por vexetación e lixo, converténdose", segundo a veciñanza, “nun auténtico foco de ratas e insectos”. Por este motivo, reclaman a canalización do mesmo, e que mentras non se acometa debido á tramitación que require con Augas de Galicia, polo menos, se leve a cabo unha limpeza regular e eficaz do seu cauce, xa que na realidade o estado de abandono fai que semella máis unha selva que unha zona urbana.

Outro dos puntos destacados foi o sendeiro que comunica a rúa coa contorna do Mercadona. A veciñanza relatou aos nacionalistas que en días de choiva, o paso é “totalmente intransitable” e que carece de iluminación, o que compromete seriamente a seguridade do tránsito peonil.

Ante esta situación, o portavoz municipal, Paco Vilariño, amosou a súa total comprensión e apoio do BNG ás demandas veciñais e esixiu ao Goberno municipal que actúe de inmediato. “Non pode haber cidadáns de primeira e de segunda en Lalín. Todos os barrios e todas as rúas deben recibir o mesmo trato e os mesmos servizos básicos, máximo cando as demandas son tan básicas coma as que expoñen”, afirmou.

Publicidade

Preme na imaxe se queres contactar connosco.

Vilariño subliñou, ademais, a importancia estratéxica da Rúa da Ponte como un dos accesos principais á vila. “Estamos falando dunha das portas de entrada a Lalín. A imaxe que ofrecemos a quen nos visita comeza por como coidamos estas zonas. Non podemos permitir que a primeira impresión sexa a dun lugar abandonado”, engadiu. Os nacionalistas fan especial fincapé, proposta que ía incluída no seu programa electoral, que a solución real non pasa por non seguir facendo unha política de parcheo e si por apostar por unha actuación integral de toda a rúa, na que incluso aportan a idea de facela en dúas ou tres fases debido ás súas dimensións e custe.

O BNG comprometeuse a trasladar estas queixas aos órganos competentes e a seguir traballando da man da veciñanza para conseguir solucionar "esta lamentable situación na que se sinten abandonados por parte do Goberno municipal ao non facerlle o máis mínimo caso, chegando incluso a ter que aturar faltas de respecto e contestacións impropias e inaceptables dunha administracións hacia os seus veciños e veciñas".