O BNG de Lalín afirma que a resposta da Xunta sobre os vertidos ao Asneiro provoca máis incógnitas

Ecos da Comarca/Lalín

Ante a resposta dada pola Consellaría de Infraestruturas e Mobilidade a respecto das preguntas formuladas polo grupo parlamentario do BNG sobre os vertidos e as medidas previstas pola Xunta de Galicia para solucionar os vertidos ao río Asneiro, en Lalín, procedentes da depuradora de Botos e que provoca contaminación no río Deza, o BNG declara que pouco lle satisface a contestación

"Deixa aberta máis incógnitas que aclaracións. En resposta a preguntas do BNG en sede parlamentaria, Augas de Galiza recoñece que tanto eles coma o Concello de Lalín eran conscientes das deficiencias de depuración, cuestión que se negou durante sucesivos vertidos, imposibles de agochar, a pesares das múltiples denuncias públicas efectuadas. Cabe preguntarse desde cando eran conscientes deste problema e que se estivo a facer en todos estes anos dentro do Plan de Vixiancia de Saneamento das depuradoras dentro do Concello de Lalín, para non ter evitado tal disparate de vertidos".

O río Asneiro contaminado. Autor: Antonio Presas.

Sinala que "agora contéstase que o plan de saneamento elaborado para a subsanar as deficiencias prevé a execución dun "Tanque de tormentas"; e mellora de colectores, para evitar colapsar a depuradora do paseo. Benvido sexa, máis non foi sen tempo. Haberá que velo!".

E recalca que "máis queda por preguntarse, que pasa, e vai pasar, coas deficiencias da depuradora de Botos?" Para o BNG de Lalín a resposta deixa moitas cuestións aínda sen clarificar, entre outras, que expliquen dende cando son coñecedores de ditas deficiencias, que tipo de deficiencias se detectaron, cal foi a natureza contaminante deses vertidos, valen para algo os plans de vixilancia (nos que se gastan miles de euros), se continuarán os vertidos dende Botos, e para cando a subsanación das deficiencias detectadas nesta depuradora, etc.