O BNG de Dozón presenta unha moción urxente sobre os lumes forestais e a limpeza de vías públicas

Ecos da Comarca/Dozón

O BNG de Dozón levará ao vindeiro pleno municipal unha moción a través da cal abordará a problemática dos incendios forestais, como acontecido hai unha semana no Castro, Dozón, onde foi necesario decretar a situación 2 de emerxencia por chegar ao núcleo de poboación.

O incendio no Castro, Dozón, de hai algo máis dunha semana. Autor: Ecos da Comarca.

"O lume volve devorar o monte galego. Desde fai xa demasiado tempo, a chegada do verán trae da man unha realidade que só mostra a súa brutalidade cando se vive de preto. Os fortes ventos e as elevadas temperaturas, xunto co abandono dos montes, e unha precaria política preventiva favorecen a propagación dos incendios e dificultan os labores de extinción. Esforzos inconmensurables que tratan de combater un inimigo que ten detrás, nunha alta porcentaxe, a man do home. Polo menos o 81% dos sinistros están causados por actividades humanas, xa sexa por neglixencias e accidentes ou de forma intencionada, segundo datos oficiais de 2017. O IPCC (Panel Intergubernamental sobre o Cambio climático), advirte que os ecosistemas do sur de Europa están entre os máis vulnerables do mundo", apunta o BNG de Dozón.

O cambio climático, apunta, "está a acelerar a virulencia dos incendios cada vez máis perigosos e con risco extremo tanto para os ecosistemas como para a poboación. Tamén, o abandono dos usos tradicionais de aproveitamento dos bosques, a perda do pastoreo

tradicional, que actúan como auténticas rozadoiras naturais da materia combustible do monte ou o despoboamento provocou a perda da paisaxe en mosaico (ese que asociamos con beleza da paisaxe e que son especialmente ricos en biodiversidade) e o aumento da superficie cuberta con maleza e bosques novos provoca un aumento da inflamabilidade ao haber máis combustible dispoñible. Doutra banda, as nefastas políticas de repoboación con especies de crecemento rápido e cultivos dunha soa especie, substituíndo así os nosos bosques autóctonos que actúan como barreira na propagación do lume, dá lugar a unha inadecuada xestión e planificación das masas forestais para

a súa adaptación ao cambio climático, e para a prevención de riscos. Todo este cúmulo de

despropósitos sementou o bosque galego de bombas de reloxería para que os incendios arrasen a nosa xeografía".

A todo isto, recalca o Bloque, "hai que sumar a non existencia de verdadeiros operativos de prevención. En Galiza, falla a prevención. É necesario que se dedique moito máis orzamento aos labores de prevención, menos mediatizas, pero que fixan poboación e emprego no sector forestal cando o emprego é estable os 365 días do ano. Temos que seguir a reclamar a creación dun servizo público galego, de xestión directa e

dependente da Xunta de Galiza, adecuadamente dotado para abordar a prevención, extinción de incendios e multiemerxencias, que poida alternar os labores de extinción no verán e a prevención durante todo o ano. Da mesma maneira, urxe abrir un proceso de actualización da Lei 3/2007 de prevención e defensa contra os incendios forestais de Galiza, así como unha rectificación profunda do actual Plan de Prevención e Defensa contra os Incendios Forestais de Galiza (Pladiga), coa participación activa de todo o tecido de entidades relacionadas co monte, o agro e a xestión forestal, para garantir medidas efectivas na protección contra os lumes".

Publicidade

Preme na imaxe para obter máis información do evento.

Por todo, isto, destaca que "é necesario un pulo decidido a políticas estruturais que preserven a biodiversidade natural, restauren os ecosistemas danados e recuperen os usos tradicionais e multifuncionais dos montes, como o pastoreo, e que contribúen a fixar poboación no rural e a afastar os lumes". "Precísanse novas estratexias dirixidas a un rural que non é o de fai 30 ou 40 anos, e onde se teña como premisa fundamental a súa revitalización, e a reactivación económica e produtiva no territorio. O noso termo municipal non é alleo a toda esta problemática polo que desde o Concello podemos exercer un papel decisivo na prevención en materia de limpeza. A comezar pola aprobación do

plan municipal de prevención de incendios forestais que determine as faixas de protección dos núcleos rurais e a limpeza das pistas e camiños de titularidade municipal. Tamén debemos reclamar aos organismos titulares das estradas que atravesan o noso termo municipal para que manteñan limpas as beiras das mesmas e así evitar que os lumes pasen dunha marxe á outra con moita facilidade, caso da autovía Santiago -Ourense ou a N 525".

Así mesmo, considera "que o papel do Concello debería ir encamiñado a facer todo o posible por conservar aqueles espazos naturais que rodean ás nosas parroquias e que na actualidade, afortunadamente aínda conservan especies autóctonas mantendo baixo control á vexetación invasiva. Ademais, consideramos importante a recuperación dos nosos camiños que fan de freo ao avance a vexetación incontrolada e á vez xeran oportunidades de lecer e deporte".

Polo anteriormente exposto, o concelleiro municipal do BNG do concello de Dozón presenta para a súa aprobación polo pleno da corporación esta moción, propoñendo a adopcións dos seguintes ACORDOS:

1.- Instar á Xunta de Galiza implantar un servizo de prevención e extinción de incendios totalmente público e operativo 365 días ao ano centrado na selvicultura preventiva e limpeza de devasas.

2.- Aplicar, ou elaborar, un plan de prevención de incendios no Concello de Dozón, segundo fixa a Lei de Montes do ano 2003 e cumprir a normativa vixente referido ás faixas de protección.

Publicidade

Preme na imaxe para obter máis información do evento.

3.- Reclamar á Xunta e ao Estado, como titulares das estradas AG53 e N525, o mantemento das marxes de ambas estradas libres de especies pirófitas.

4.- Traballar dende o Concello nun plan ambiental encamiñado á conservación, e incorporar ao inventario municipal de bens, todos os camiños tradicionais que sexan de titularidade pública recuperando estes espazos como ferramentas para desenvolver unha política ambiental axeitada.

5.- Modificar o traballo de limpezas de vías e núcleos de poboación, para que se faga nos primeiros cinco, seis meses do ano, e non esperar a que sexan as festas parroquiais, que chegan tarde para a época de máis perigo por incendio.