O BNG de Cruces pide explicacións polo estreitamento na estrada entre Ollares e Salgueiros

En concreto, refírese á altura de Gandarón

Ecos da Comarca/Vila de Cruces

O BNG de Vila de Cruces, a través do seu voceiro Álex Fiuza, reclama explicacións ao alcalde e ao concelleiro de obras pola redución do ancho da estrada que une Ollares con Salgueiros, concretamente á altura de Gandarón, onde o vial se estreita de forma considerable debido a un roleiro. Segundo sinalan os veciños da zona, este estreitamento non ten sentido, xa que unha vez que se consegue mellorar o vial, este tramo dificulta o paso de vehículos e maquinaria agrícola, ademais de comprometer a seguridade viaria.

O BNG aclara que o estreitamento "non responde a ningún informe técnico, senón a un problema de delimitación de propiedade, esta falta de definición está a provocar unha situación de inacción por parte do goberno, en prexuízo dos veciños, que vén como unha inversión que resulta beneficiosa para a veciñanza de Ollares remata nunha enorme chapuza".

 PUBLICIDADE

Preme na imaxe para obter máis información do evento.

“É inaceptable que unha vía de uso público quede reducida debido á mala xestión de quen nos goberna ”, declarou Álex Fiuza, voceiro de BNG. “O goberno local debe actuar, aclarar a titularidade dos terreos e garantir a seguridade de quen transita por esta estrada”.

PUBLICIDADE

Preme na imaxe se queres contactar connosco.

O BNG solicita ao concelleiro de obras e ao alcalde Taboada que acelere as xestións necesarias para determinar a titularidade da franxa afectada e que adopte medidas urxentes para restablecer o ancho da vía. Fiuza lembra que “todas as parroquias do municipio deben recibir a mesma atención e coidado”, e reitera o seu compromiso coa seguridade viaria e a defensa dos intereses veciñais.