O BNG de Agolada lamenta que "ningunha autoridade de Medio Rural veña a este concello sen ser cando hai eleccións"

Critica que a nova conselleira deste departamento se desprazou recentemente a Lalín e que non aproveitara a ocasión para tratar o mesmo tema en Agolada

Ecos da Comarca/Agolada

Tras a reunión da Conselleira de Medio Rural co alcalde de Lalín para analizar os procesos de concentración parcelaria no concello lalinense, que segue á que xa mantivera a Directora Xeral de Desenvolvemento Rural, Inés Santé, a finais de marzo, o BNG agoladense lamenta que ningunha das autoridade de Medio Rural se achegara ata Agolada aproveitando estas visitas para falar do mesmo tema.

Susana Tato, concelleira do BNG de Agolada.

Para o BNG, "existe unha diferenza básica entre os compromisos e visitas aos dous concellos. Mentres en Lalín fan as visitas despois dos procesos electorais, en Agolada fanse en datas previas aos mesmos. Temos que recordar que a última visita dun Conselleiro de Medio Rural a Agolada para falar das parcelarias foi en marzo de 2019 e a

da Directora Xeral de Desenvolvemento Rural, Inés Santé, foi en febreiro de 2023, ambas

en vésperas de eleccións municipais con compromisos sobre ditas parcelarias que logo

quedan en promesas electorais baleiras e papel mollado".

Publicidade

Preme na imaxe se queres contactar connosco.

O partido nacionalista apunta que "o descontento dos veciños, que están agardando dende hai 22 anos que os seus procesos de concentración avancen, é evidente. A última ocasión que tiveron para reunirse con representantes da Consellería de Medio Rural foi en febreiro de 2023, cando se lles asegurou que os procedementos estaban en marcha e que volverían reunirse con eles antes de rematar o ano 2023, data que foi incumprida levando meses de atraso coa agarda dos afectados e afectadas polos procesos, que teñen proxectos en mente se se levan a cabo e nos que inflúe moito a ordenación do territorio".

A concelleira do BNG, Susana Tato, lamenta que “non se poña atención á veciñanza en algo que beneficiaria moito aos concellos rurais, ao seu avance económico, onde a intención clara por parte do goberno da Xunta debería ser a de preservar a poboación que

aínda reside no rural e quere ser parte dun relevo xeracional cada vez máis escaso, deixando unha fonda crise demográfica coa súa marcha ao enlentecerse tanto os

procesos de concentración coma estes.”

NOTICIA RELACIONADA:

• A Consellería de Medio Rural avanza na tramitación das concentracións parcelarias de Lalín: https://www.ecosdacomarca.com/post/a-conseller%C3%ADa-de-medio-rural-avanza-na-tramitaci%C3%B3n-das-concentraci%C3%B3ns-parcelarias-de-lal%C3%ADn