O BNG cruceño logra o apoio do Pleno para realizar melloras no Poboado Mineiro de Fontao

Fiuza pídelle ao goberno local "maior implicación e un mellor mantemento das instalacións e do entorno dun espazo único, que debería ser referencia patrimonial e turística"

Ecos da Comarca/Vila de Cruces

O BNG de Vila de Cruces pedio no último pleno levar a cabo melloras no Poboado Mineiro de Fontao, un espazo único. A súa proposta contou co apoio do resto de partidos políticos.

Publicidade

Preme na imaxe para obter máis información do evento.

O Poboado Mineiro de Fontao (Vila de Cruces) foi construído, tal e como sinala o Bloque, no ano 1954 "para dar vivenda ao persoal da mina, un espazo con vivendas para as persoas obreiras, para as persoas capataces, para a parella de mestres, cun cine, unha igrexa e unha escola. A súa construción coincidiu en tempo co declive da demanda do wolframio, polo que non tardou en quedar case abandonado… dise que case, porque sempre viviron nel algunhas familias ás que a empresa da mina alugaba as vivendas".

É un espazo, apunta, "moi peculiar tanto pola importancia histórica da mina, como polo seu estilo arquitectónico, motivo polo que é considerado un espazo patrimonial. Despois de anos de abandono, foi adquirido pola Xunta no ano 2000, elaborando un plan especial para a súa recuperación que se aprobou no 2002. Rematouse a rehabilitación das vivendas no 2004 para ser destinadas a vivendas de protección autonómica; as vivendas foron adxudicadas en decembro de hai 20 anos".

"Nunha segunda fase, rehabilitáronse as escolas, o cine e a igrexa, estes dous últimos para ser un museo que no seu día foi obxecto do despilfarro sen contido polo Partido Popular e que agora, é un cúmulo de gastos sen beneficios para o concello pola mala xestión tamén do Goberno actual de Luis Taboada. O abandono non se limita ás dependencias do museo, senón que se estende ao resto dos espazos comúns do poboado, con bancos estragados, con alumeado en condicións deplorables e que constitúen un perigo para as persoas, cun mantemento das zonas verdes pouco frecuente, cunha recollida de lixo insuficiente, con bloques de vivendas restauradas e outros sen restaurar", subliña o BNG.

Debido a esta situación o BNG volveu presentar unha nova iniciativa no pleno ordinario do 31 de xaneiro, que foi apoiada polo pleno, na que se demanda ao goberno municipal "o aproveitamento racional e rendible do conxunto museístico, facendo as reparacións pertinentes e dotándoo dunha colección acorde ao espazo, que converta Fontao nun

referente turístico da memoria, un espazo de lecer e aprendizaxe para a veciñanza así como para as persoas visitantes, o mantemento dos espazos comúns, revisando todo o

alumeado público, para retirar e substituír os elementos lumínicos que están estragados,

coa mellor premura posible, pola perigosidade que supoñen".

Publicidade    

Preme na imaxe se queres contactar connosco.

Ademais pide solicitar información ao Instituto Galego de Vivenda e Solo (IGVS) sobre os plans que hai sobre a restauración dos bloques de vivendas que están sen rematar, e demandar a axilización do proceso, xa que a estética actual do Poboado Mineiro de Fontao non atende ao seu valor patrimonial.